Hemserekê Konseya Rayberdişî ya KCKyî Cemîl Bayikî qismê diyînî yê roportajê xo de kombîyayîşê Madridî yê NATOyî, gefê îşxalî yê vera Rojawanî, tedayê AKP-MHPyî û krîzo sîyasî yê Başûr û Iraqî ercnayî.

Qiseykerdişê Bayikî ra tay noqtayê girîngî wina yê: 

''Dewleta tirke têna dişmena kurdan nîya dişmena pêro şaranê Sûrîye, demokrasî, azadîye ya. Ganî şarê Rojawanî ney hol bivînê. Wa şarê Rojawanî xo rêxistin bikerê, pê xo bawer bikerê, seba Şerê Şarî yê Şorişgêrî xo amade bikerê û xo ver bidê. Dewleta tirke wazena Rojawan de demografî bivurna. Yanî qetî yo ke do hêrişê Rojawanî bêro kerdene. Ez pê bawer a ke şarê ma îşxalê Girê Sipî, Serêkanîyê û Efrînî de se kerdo narey do nêkero û koletîye do qebul nêkero, erdê xo war nêverdo. Dewleta tirke 2022 de hêrişê Herêmanê Pawitişî yê Medya kerd û waşt ke gerîlayan tasfîye bikero. Wexto ke şerê Rûsya-Ukrayna dest pêkerd înan no seba xo sey firsendêkî dî. Înan dî ke Herêmanê Pawitişî yê Medya de nêeşkenê ser bikewê verê xo da Rojawanî. Nika seba ke Rojawanî îşxal bikerê bazarîye kenê.

Eke şarê ma yê Rojawanî hetê hêzanê leşkerîyan de şer bikero, taktîk û koordînasyonê şerî aver bero vera dewleta tirke do ser bikewo. Tirkîya nika pê hesîyaya ke NATO, Amerîka û Ewropa tay hetan ra muhtacê ci yê. Coka waşt ke tay waştişê xo bidê qebulkerdene. Wa pêro şarê Rojawanî pîya vera îşxalî bigêrê, amadekarîyanê şerî temam bikerê. Şarê ma seba ke bombardumanan de zerar nêreso ci wa xo rê cayanê nimitişî viraşê, seba malzemeyanê sey derman û erzaqî tedbîran bigêrê, bingeyê xopawitişî de her ca de perwerdeyan bidê. Eke şarê ma wina bikerê do serkewtişanê pîlan bivisnê destî.

Îqtîdarê AKP-MHPyî qels bîyo û seba ke nêşoro teda û zulmî keno.No îqtîdar merdimanê bêsûcan tepişeno, zîndanan de merdiman rê îşkence keno, kişeno, cenazayanê tepişteyan remneno. Îqtîdar keno ke zîndanan de îradeyê merdiman teslîm bigêro. Îqtîdarî Kurdîstan û Tirkîya vurnayê cehenem û zîndanî. Îqtîdar hunermendan, rojnamegeran tepişeno ke wa raştîyan nêvajê. La ê do nêeşkê şarî û rojnamegeran bêveng bikerê. Hînî peynîya înan ameya.

Iraq de seba ke demokrasî çin a û hişmendîya netewe-dewlete est a krîzî safî nêbenê. Xora şar seba ke sîstemê demokrasî wazeno zafê ci nêşîyo weçînayîşî. Reyna erdê Iraqî de seba ke hêzê mîyanneteweyîyî peyê menfaatanê xo de yê krîzî safî nêbenê. Bi taybetî dewleta tirke pê destekê PDKyî Iraq de krîzan kena pîlêr. MÎT Başûr û Iraq de rêxistinkerde yo, dewleta tirke xeylêk cayanê înan de baregehî nayê ro, tehlukeyê îşxalî yê vera Başûrî zêdîyeno. Tirkîya Iraq, Başûr û Barzanî esîr kerdo. Tirkîya kena ke krîzanê Iraqî bizêdîna û erdê Başûrî debikera mîyanê erdê xo. Wa şarê Başûr û Rojhelatê Mîyanênî pê nê sîyasetê Tirkîya bihesê, vera îşxalê Tirkîya vinderê û vera hemkarîya PDKyî tewirê xo bimojnê.

Sîstemê modernîteya kapîtalîste mîyanê krîzî de yo coka Şerê Dinya yo 3. qewimîyeno ke merkezê nê şerî Rojhelato Mîyanên û Kurdîstan o. Amerîka û NATO wazenê Rûsya qels bikerê û dekerê xo mîyanî û verê Çînî bigêrê. A raşte Çîn û Rûsya zî mîyanê sîstemê kapîtalîstî de yê. Nika mabênê modernîteya kapîtalîste û şaran de yew nakokîye qewimîyena û heta ke nê meseleyî çareser nêbê krîzî zî nêqedîyenê. Çînî vato ke şero serdin agêrayo la no tesbît raşt nîyo.

NATO ronîyayîşê têgêrayîşê ma ra nata hetkarîya dewleta tirke kena. Dewleta tirke nika qirkerdişê kurdan kena, vera gerîlayan hêrişanê kîmyewîyan kena, demografîyan vurnena. La seba ke Tirkîya endamêka NATOyî ya çew ci rê vengê xo nêkeno. Wexto ke Olof Palme kişîya sûcê ney erzîya milê PKKyî ser û PKK gêrîya lîsteya terorî. Dewleta tirke no xo rê kerd firsend û vat 'Heqê min o ke PKK kamca de bibo ez ey bikişa.' NATOyî û welatanê xerîban bingeyê ney viraşt. NATOyî û modernîteya kapîtalîste Kurdîstan kerde parçe bi parçe, sîyasetê îmha yê vera kurdan kerd meşrû, vera Rayber Apoyî komplo viraşt. Rixmê nînan zî têgêrayîşê ma û fikrê Rayber Apoyî vila bîyî. Seba ke no seba înan tehluke yo înan Madrid de vera ma komployêko newe viraşt. Madrid de vera şarê ma, Rojawanî û têgêrayîşê ma birê neweyî ameyî girewtene. Yanî NATOyî sîyasetê vera kurdan û PKKyî yê Erdoganî qebul kerdo.

Nê kombîyayîş de rîyo raştikên ê Amerîka û NATOyî ame dîyene. Dewleta tirke kurdan qir kena. Dewleta tirke nê ganî kurdî bêrê pawitene. La modernîteya kapîtalîste paştî dana dewleta tirke. Wa şarê ma ney hol bivîno. Kombîyayîşê Madridî de dewletanê bînan Rojawanî rê nêva terorîst la reyna zî bira îşxalî ya Tirkîya tesdîq kerde. Şarê ma bi taybetî şarê Rojawanî naye ra wa rîyê raştikênî yê Amerîka, Ewropa û NATOyî bivîno. Nê kombîyayîşî ra dima cara dewleta tirke hêrişê xo zêdînayî. Amerîka, NATO û Ewropa têkilîya Tirkîya ya bi DAÎŞî zanenê la seba menfaatanê xo ney peygoş kenê.

Hînî çew nêeşkeno şarê kurdî bixapîno. Çew nêeşkeno şarê kurdî, Rayber Apoyî û PKKyî teslîm bigêro. Dewleta tirke û hemkarê ci se kenê wa bikerê nêeşkenê Tirkîya bixelisnê û kurdan biqedînê. Wa kurdan rê hurmet bikerê. Kurdan rê deyndar ê ke ganî nê deynê xo bidê. Wa hînî naye ra fek vera bidê û raşt nêzdîyê Rayber Apoyî û PKKyî bibê.''