Hemserekê Konseya Rayberdişî ya KCKyî Cemîl Bayikî derheqê rojdemî de ercnayîşê muhîmî kerdî. Roportajo ke Bayikî da ANFyî qismê ci yo verên wina yo:

Tecrîdê serê Rayberê Şarê Kurdî Abdullah Ocalanî dewam keno û tim û tim cezayê dîsîplînî yenê dayene. Îqtîdarê AKP-MHPyî bi tecrîdî wazeno se bikero? Şima Rayraşîyayîşê Gemlîkî û çalakîyanê vera tecrîdî senî ercnenî?

Vera tecrîdê serê Rayber Apoyî Rayraşîyayîşê Gemlîkî ame kerdene. Dewleta tirke waşt verê nê rayraşîyayîşî bigêro la nêeşkeye. Coka Rayraşîyayîşê Gemlîkî tesîro pîl kerd. Coka kam/e ke tewrê na çalakîye bi û semedê ci kede daye ez înan selam kena. Bi nê rayraşîyayîşî tersê îqtîdarî yê serê komelî ame rijnayene. Nê rayraşîyayîşî cesaret da her kesî. Badê rayraşîyayîşî hem muneqeşeyê pozîtîfî ameyî kerdene û hem zî muneqeşeyê ke xizmetê şerê taybetî kenê ameyî kerdene. La no hêz û tesîrê Rayber Apoyî ramojneno.

AKP û MHP semedê domnayîşê îqtîdarê xo tecrîdî xorî kenê. Wazenê îradeyê Rayber Apoyî bişiknê la nêeşeknê. Yew heqîqetê Rayber Apoyî est o. Seba ke ey semedê kurdan, şaranê Rojhelatê Mîyanênî têkoşînê azadîye rayra berd ame esîr girewtene. Rayber Apo teber de zî bado ke esîr ame girewtene zî semedê demokratîkbîyayîşê Tirkîya û çareserkerdişê meseleya kurdan têkoşîn kerd.  Îqtîdar wazeno vera demokrasîyî sîstemê xo yê faşîstî bikero mende. Semedê nê heme îmkananê Tirkîya şuxulneno. Verê înan de astengo tewr pîl Rayber Apo yo. Coka Îmrali de şero psîkolojîk yeno rayraberdene. Eke Tirkîya de demokrasî yeno waştene ganî her kes vera tecrîdî vejîyo. Heta ke vera tecrîdî nêro vindtene demokrasî do nêro Tirkîya.

Serrgêra 26. ya şehadetê Şehîde Zîlane de xeta fedayîtîye Têgêrayîşê Azadîye de senî yena ciwîyayene? Fedayîtîye ganî senî bêro famkerdene?

Rayber Apoyî Kurdîstan de yew têgêrayîşo fedayî vet meydan. Çunku teberê fedayîtîye de qet yewna çî kerdişanê Kurdîstanî rê nêbeno cewab.  Kurdan mergî ra nêaçarneno û ganî nêkeno. Aye ro sereyê têgêrayîşî ra heta ewroyî têkoşîn serê xeta fedayîtîye de yeno averberdene. Mîlîtanê nê têgêrayîşî û şarê kurdî tim bi hewayêkê fedayîkî têkoşîn keno. Embaze Zîlane xeta ke Rayber Apoyî aver berde, zaf hole fam kerde. Coka waşt na xete bido ciwîyayene û çalakîye kerde. Rayber Apo coka embaze Zîlane ser zaf vindet. Mîlîtanê nê têgêrayîşê zî na xeta fedayîtîye esas genê. Zap, Avaşîn û Metîna de xeta fedayîtîye ya ke embaze Zîlane vete meydan merheleya tewr berze de yena caardene.

Eke na xete hole bêro famkerdene xeta fedayîtîye de têkoşîn aver şino.  Na xete ge ge xelet yena famkerdene. Rayber Apo nêvano çalakîye bikere û bibe şehîd. Rayber Apo vera felsefeya mergî ya ke  dewleta tirke kurdan rê ferz kerda, felsefeya ciwîyayîşî aver berde. Bi na felsefe vera îşxal û qirkerdişî ame vindetene. Na felsefe şarê kurdî gangeşî ra wirzna pay. Rayber Apoyî ra pîlêr fedayî çîn o.  Çunke pêro emrê xo na azadîya şaran ser. O semedê azadîye û demokrasîyî ciwîyeno.  Embaze Zîlane zî a xete hole fam kerd û çalakîya fedayîye kerde. Nê semedî ra Zîlane hema ciwîyena.  Na xeta têkoşînî têgêrayîş, mîlîtan û şarî dana ciwîyayene.

17ê nîsana 2021î ra nata Zap, Avaşîn û Metîna de şero giran yeno qewimîyayene. Rewşa peyêne yê şerî senîna û şima têkoşînê gerîlayanê HPG û YJA Starî senî ercnenê? Gerîlayê ke Zap, Avaşîn û Metîna şer kenê, mesajê şima semedê înan çî yo?

Herêmanê Pawitişî yê Medya de şero giran est o. Îqtîdarê AKP û MHPyî îqtîdarê şerî yo. Tirkîya de yew qanûno nênuşte est o, kam ke vera kurdan şer bikero, yeno îqtîdar. Teberê nê de mumkun nîyo. Eke îqtîdar şerê vera şarê kurdî de ser nêkewo, nêeşkeno payra bimano. Îqtîdar semedê caardişê wezîfeyê xo çîyo ke destê ci ra yeno keno. Heme îmkananê Tirkîya şuxulneno. Çunku heta ke têgêrayîşê PKKyî, gerîlayan tesfîye mekero nêeşkeno qirkerdişî temam bikero. O wext zî nêeşkno îqtîdar de bimano. Heta înan ra hesab zî yeno persayene. Nê zaf hole zanê. Coka heme îmkananê xo şuxulnenê û hêrişê Rayber Apo, PKK, gerîlayan û kurdanê azadan kenê. Wazenê Tirkîya semedê kurdan, şaran, roşnvîr, nuştox, hunermend, sosyalîst û hêzanê demokrasîyî bikerê zîndan.

Dewleta tirke vera gerîlayan şerê normalî nêkena. Qanûn û ehleqê şerî binpay kena. Heme çekanê qedexeyan şuxulnena. Gerîlayî vera nê hêrişan bi hewayêkê fedayîkî şer kenê.  Gerîlayî şertanê zehmetan de destan nusenê, têdima derbeyanê giranan danê dişmenî ro. Dewleta tirke şarê Tirkîya xapînena, binkewtişê xo nimnena. Mergê leşkeran yeno nimitene. Bi na wesîle ez fedayîyaynê Zap, Metîna û Avaşînî selam kena û hurmetê xo teqdîm kena.  Ê têna semedê kurdan û PKKyî nê semedê merdimîye şer kenê û şehîd benê. Pêro şehîdê girdî yê şarê kurdî  û merdimîye yê. Ez embazanê şehîdan bi hurmet yad kena.

Dewleta tirke ya îşxalkere pîya bi Herêmanê Pawitişî yê Medya hêrişê Mexmûr, Şingal û xelylêk herêmanê Başûrî kena. Hêrişê vera Kelarî de Ferhat Şiblî şehîd bi. Dewleta tirke bê îstîxbaratî eşkena nê hêrişan bikero? Êyê ke paştî danê dewleta tirke kam ê? Vera nê hêrişan nêrazîbîyayîşê partîyanê sîyasîyan ê Başûrî û dewleta Iraqî kamyew merhale de yê?

Ferhat Şiblî û embazê ci yê ke pîya şehîd bîyî, ez înan bi hurmet yad kena.  Ferhat Şiblî serkêşîya Şorişê Rojawanî kerdêne. Şarê Rojawanî rê xizmeto xurt kerd. Gama ke o şehîd bi şarê Rojawanî wayîrê ci vejîya. No zî ramojeno ke ê senî kede daye. Dewleta tirke tim hêrişê Vakur, Başûr û Rojawanî kena. Vana kam ke semedê azadîya kurdan şer keno dişmenê min o. Çunku wazena kokê kurdan bîyaro. Dewleta tirke nêeşkeyêne Silêmanî de Şehîd Ferhat û embazanê ci qetil bikero. Eke PDK îstîxbarat medayêne MÎTî ê nêeşkayêne wina yew qetilkerdişî bikerê. Şarê ma nê zaf hol zano. PDK û îstîxbaratê ci Parastin Herêmanê Pawitişî yê Medya de û teberê ci de zanayîş arê danê û îstîxbarat danê. Bitaybetî cayê embazanê berpirsîyaran tesbît kenê û xebere danê MÎTî. MÎT zî bi nê zanayîşan hêriş keno, qirkerdişan keno. 

Eke PDK û Parastin dewleta tirke reyde hemakerîye  mekero, Tirkîya qet nêeşkena yew cayê Başûrî de game bierzo. PDK her hetî ra bi MÎTî xebityeno û MÎT wina qirkerdişan keno. Dewleta tirke seba ke kurdan werte ra wedaro wezîfeyo gird dayo MÎTî. MÎT zî pê hemkarîya PDKyî qirkedişan keno. Vakur de hemkarê ci est ê û înan serî ra hêriş kenê. Tewirê dewleta Iraqî zî eşkera yo. Vera dewleta tirke qet tewir nêgenê. Dewleta tirke Başûr Îşxal kena, baregehanê leşkerî virazena, her ca de qirkerdişan kena la vengê Iraqî nêvejîyeno.  Başûr de xora PDK bêveng o. PDKyî partîyê Başûr zî bi zextî girewtî binê kontrolê xo. Ganî kurdî şirê PDKyî ser ke wa na xeletî ra agêro.  Wa çew xo mexapîno nê hêrişî têna vera PKKyî nîyê. Verî hêrişê PKKyî kenê ke verê xo abikerê. Bi na wesîle ez veng dana partîyan û şarê Iraq û Başûrî vera hêrişanê dewleta tirke vejîyê. Eke ewro vera hêrişan mevejîyo, siba do derbeyê giranêr bêrê werdene.

MÎT çîyo ke Tirkîya Vakurê Kurdîstanî de kerd, eynî çî Başûr de zî keno.  Bi zext û hêrişan kesanê têkoşeran tehdît keno ke teslîm bigêro. Şima na xebata MÎTî senî ercnenê û ganî komel vera nê se bikero?

Vera têgêrayîş û şarê ma hêrişê qirkerdişî yenê rayraberdene. Dewleta tirke û îqtîdarê AKP û MHPyî rolo gird dayo MÎTî. MîT sîyasetê qirkerdişî rayra beno ke merkezê şerê taybetî yo.  Vakur, Rojawan , Başûr û Ewropa de qirkerdişan keno. Seba ke wina yew rolê MÎTî est o, dewlete zaf îmkanî fînayî xizmetê ci. Hemkraro pîl ê MÎTî Barzanî yo. Nê her kes zano. Eke Barzanî ey de hemkarîye mekerdayêne rewşa kurdan do ewro zaf hole biyêne. Kurdî pê îmkananê ke destê ci yê, Rojhilatê Mîyanênî de cuyêka hêzdare eşkenê rayra berê. PDK û Barzanî verê nê genê. Xizmetê dewleta tirke kenê. Coka her roje komelê kurdan bineyna rîyê înan o raştî vînena.

Mît telefonan şuxulneno û na çarçewe de yew ekîb nayo ro ke her yew qismê ci Vakur, Başûr û Rojawan de yo. Qanûn û ehleq gerîyayî binê lingan. Şarî rê telefon kenê. Kenê ke şarî bixapînê û PKKyî ra raqilnê. Êyê ke xizmetê ci nêkenê pê mergî tehdît kenê.Tayînan qetil kenê. Ganî şarê ma înan a mexapîyo rixmê tehdîtanê înan goş medo înan. Beno ke MÎT îmkananê madîyan bido. Ganî kurdî şeref û anorê xo vera pereyan mebedilnê. Ganî vera MÎT rêxistinkerde bêro vindetene. Eke şar qerardar têbigêro, MÎT nêeşkeno xo rê hemkar û ajanan bivîno û qirkerdişan bikero.