Hemserekê Konseya Rayberdişî ya KCKyî Cemîl Bayikî derheqê xoverdayîşê gerîlayan ê Zap, Metîna û Avaşînî de bi vîdeoyêkî mesajêk erşawit. 

Cemîl Bayikî mesaj de wina qisey kerd:

''Dewleta tirke vera Zap, Metîna û Avaşînî hêrişê îşxalî dayî destpêkerdene û nê hêrişî dewam kenê. Dewleta faşîste wazena PKK tasfîye bikera. Çira? Çunke a vera kurdan hêrişanê qirkerdişan kena û coka wazena PKK tasfîye bikera. Nê hêrişî vera destkewteyanê Kurdîstanî yê; têna vera PKK, gerîlayan û Vakurî nîyê. Fikro winasên destkewteyanê kurdan tehlukeyê pîlî virazeno.

Naye ra gerîlayê HPGyî vera îşxalkeran bi hawayêkê fedayî têkoşîn kenê, xoverdayîşêkê tarîxî kenê. Gerîlayî wazenê plananê îşxalî yê dewlete pûç bikerê, destkewteyanê kurdan bipawê. Goreyê zanayîşanê ma 6 embazê ma şehîd bîyî; ez înan bi minet û hûrmetî yad kena. Ez fermandar û şerwananê nê şerî fîraz kena. 

Seke zanîyeno Rojhelatê Mîyanênî de Şerê Dinya yo 3. esto. Nê şerî de kurdî yenê hedefkerdene. Warê mîyanneteweyî de, Kurdîstan de hetkarê dewleta tirke esyê. Dewleta tirke pê na hetkarîye kurdan qir kena. Gerîlayî seba pêro parçeyanê Kurdîstanî şer kenê. Gerîlayî benê hêvîya her kesî.

Gerîlayanê HPGyî wezîfeyêko tarîxî girewt xo milî û seba nê wezîfeyî ê hê ganê xo feda kenê. Nê çêrî ewladê şarê kurdî yê. Coka kurdî kamca de benê wa bibê ganî wayîrê nê ewladanê xo vejîyê. Ganî her kes nê xoverdayîşê tarîxî de ca bigêrê. Têna pê seyrkerdişî nêbeno. Kurdî  ganî nê têkoşînî bivînê û tede ca bigêrê. Nê prosesî de kesê ke xo rê vanê kurd, welatperwer, şorişgêr, welatperwer, demokrat ganî nê xoverdayîşî de ca bigêrê.

PKKyî vera kamyew parçeyê Kurdîstanî hêriş amebi kerdene vera ci şer kerd. Wezîfeyê xo yo neteweyî û tarîxî ard ca. Ê kesê ke xoverdayîşê Zap, Metîna û Avaşînî nêvînenê ma înan sey welatperwer, demokrat û heta sey kurd nêvînenê. Çunke no têkoşîn têkoşînê kurdan o.

Embaz Murat Karayilanî zî vatbi 'Şerê ma şerê pawitişî yo meşrû yo, pawitişê destkewteyanê kurdan û Kurdîstanî yo. Ma erjanê merdimîye pawenê.' Ma zî sey ey fikirîyenê. Coka ganî her kes vengdayîşê Karayilanî û gerîlayan bivînê. Ma ganî pîya destkewteyanê xo bipawê. Dewleta tirke ya faşîste vana 'ez kurdan qir kena.' Nêvana ke 'meseleya mi têna bi PKK û Vakurî esta.' Hedefê ci pêro kurdî yê. Coka no şer şero neteweyî yo.

Kurdê pêro parçeyanê Kurdîstanî û teberê welatî ganî nê xoverdayîşî de ca bigêrê. Ganî ma nê şerî bikerê şerê azadîya kurdan. Çunke polîtîkaya vera kurdan polîtîkaya qirkerdişî ya. Têkoşînê gerîlayan o nikayên têkoşînê pawitişê cuye û estbîyayîşê kurdan o. No wezîfeyê pêro kurdan o. Ganî ma wayîrê destkewteyanê kurdan û Kurdîstanî vejîyê. Êyê ke nê xoverdayîşî de ca nêgênê do derbêka pîle bidê kurdan ro. 

Gerîlayî seba destkewteyanê kurdan canê xo feda kenê, şehîd benê. Ez zanena ke şarê kurdî do naye fam bikero û wayîrê ewladanê xo vejîyo. Bi taybetî cinî û ciwanî ganî şarê kurdî wurzê payan ser. 

Ewro şarê kurdî se keno wa bikero meşrû yo. Kurdî coka destê înan ra çita yeno wa bikerê. Êyê ke nê têkoşînî de canê xo feda kenê înan xo vîr a mekerê. Şehîdî seba ma sebebê rêxistinîye û têkoşînî yê. Kurdan rê têna serkewtiş lazim o. Serkewtişî ra ber çîyêk nêeşkeno kurdan çinbîyayîşî ra bixelisno, cuya azade pêşkêş bikero.

Ez reyna gerîlayanê ke destkewteyanê kurdan vera hêrişan pawenê, seba naye canê xo feda kenê bi rêzdarî selam kena. Ez şerwan û fermandaranê nê şerî fîraz kenê, selam û hûrmetê xo înan rê pêşkêş kena. Nê şerî de ma wezîfeyê xo heta peyêne do bîyarê ca. Şarê kurdî qetî do ser bikewo û merdimîye zî ser bivisno.''