Hemserekê Konseya Rayberdişî ya KCKyî Cemîl Bayikî programêkê taybetî yê Stêrk TVyî de rojdem erjna.

Cemil Bayikî derheqê averşîyayîşanê ke badê pêvînayîşê Rayber Apo û DEM Partî ameyî qewimîyayene de nê vatî: ''Heta nika ne hetê Rayber Apoyî ra ne zî hetê dewlete ra ma rê qet zanayîşêk ame. Dewleta tirke nika vera şarê kurdî û Têgêrayîşê Azadîye şerê girdî rayra bena. Semedê dewleta tirke çîyêk nêbidilîyayo. Eke raşta wazenê wa wayûbiratîye bibo o wext wa heqanê kurdan esas bigîrê. Tirkîya de  kamyew heqê tirkan est ê, ganî kurdî zî wayîrê nê heqan bê. La ma vînenê ke heme heqê kurdan est ê la her çîyê kurdan werte ra wedarenê. Plananê xo goreyê çînkerdişê kurdan kenê. Na wayûbiratîye nîya, bi temamî xapinayîş o.''

Cemil Bayikî yê ke eşkerayîyê ke badê pêvînayîşê DEM Partî û heyetê AKPyî ameyî kerdene û mesajê Serekkomarê Tirkî Recep Tayyip Erdoganî erjnayî wina vat:  ''AKPyî badê pêvînayîşê bi heyetî vat 'ma pîya qisey kerd' yanî bi hewayêkê giranî nizdîyê ci nêbîyî.  Ma nê nêzdîbîyayîşî ra fam kenê ke AKP nêwazeno meseleya kurdan bêra çareserkerdene, Tirkîya biba demokratîke. Eke înan çîyo wînayên biwaştêne wina yew ziwan nêxulnayêne, bi hewayêkê giranî nêzdîyê ci bîyêne. Mesela partîyanê bînan mesele dahîna giran girewt dest, fîkrê xo vatî, rexneyê xo kerdî. La AKP senî ke pê yarî bikero, wina girewt dest. Mesela Tayyip Erdogan û tay selahîyetdarê AKPyî bi eşkerayîyanê xo çareserkerdişê meseleyanê Tirkîya nê dahîna xorîkerdişê ci wazenê.''