Hemserekê Konseya Rayberdişî ya KCKyî Cemîl Bayikî beşdarê bernameyêkê Stêrk TVyî bi û rojdem ercna. 

Qiseykerdişê Bayikî ra beşêk wina yo:

''Dewleta tirke her ke şina tecrîd kena giranêr, ne şare kurdî ne zî Rayberîye ne tecrîd qebul nekenê. Dima ke şarê ma, hêzanê demokrasî û dostanê kurdan vera tecrîdî nêrazîbîyayîşê xo mojna pêvînayîşê bi 4-5 deqayan ame kerdene. La dima înan nêverda ke Rayber Apo qisey bikero û telefon birna. Wexto ke Rayber Apoyî raştîyî vatî, dewlete rexne kerd telefonê ci birîuya. Wa her kes bizano ke Rayber Apon22 serrî yo binê tecrîdêkê giranî de yo. La Rayber Apoyî senî ke teber de vera dişmenî xo ver da zere de zî wina xo ver dano û bi nê hawayî verê qirkerdişê kurdan gêno. Coka dewlete pê tecrîdî qesasê xo gêno.  Ganî pêro merdimî ney bivînê û xo Rayber Apoyî rê minetdar hîs bikerê. Ganî ma xo rê tewirê Îmraliyî yê Rayber Apoyî esas bigêrê, wezîfeyê xo yê têkoşînî bîyarê ca.

18ê Gulane rojan şehîdan a, menga gulane zî menga şehîdan a. Kurdîstan de wayîrvejîyayîşê şehîdan pîl o. Çar parçeyanê Kurdîstanî ra şehîdê ma yê pîlî estê, têgêrayîşê ma têgêrayîşê şehîdan o. Rayber Apoyî xeta şehîdan awan kerde û têgêrayîşê ma na xete ser o ame averberdene. Ganî na xete biba esase. Şehîdê ma hêzê ma yê. Nê şehîdanê ma seba şarê xo têkoşîn kerd, erdê xo pawit. Ma do pê têkoşînê xo armancanê şehîdan bîyarê ca û bi nê hwayî wayîrê mîrasê înan vejîyê. 

Ronayîşê Komara Tirkîya ra nata kurdî seba azadîya Kurdîstanî şer kenê. Dewleta tirke zî naye ra tim wazena kurdan qir bikera. Dewleta tirke de eke îqtîdarêk biwazo payan se ro vindero hêrişê kurdan ganî bikero. Îqtîdarê AKP-MHPyî zî wina keno hêrişê têgêrayîşê ma, kurdan keno û polîtîkaya qirkerdişî ano ca.

Tewr zaf PKK vera nê îqtîdarî têkoşîn keno û ey qels keno. Ê zî zanenê ke vera armancanê înan astengîya tewr pîlêre PKK yo. Ewro tay kesî vanê 'Meseleya dewleta tirke bi kurdan çin a, têna bi PKKyî esta.' Nê kesî zî sey dewlete wazenê PKK tasfîye bibo. Rojawan û Başûr de kerdişê dewleta tirke werte de yê. Eşkera yo dewleta tirke têna dişmena PKKyî nê dişmena pêro kurdan a. PKK kurdan paweno, seba azadîya kurdan şer keno. PKK îradeyê kurdan temsîl keno. Dewleta tirke Rojawan, Başûr û Vakur de sûcanê merdimîye kena, çekanê qedexekerdeyan xebitnena. Dewleta tirke wazena pê tasfîyeya PKKyî dest pê qirkerdişê kurdan bikera. Gerîlayê HPG-YJA-Starî vera ney têkoşîn kenê.

Dewleta tirke hînî zêdêr polîtîkaya qirkerdişî ana ca.  La têkoşînê kurdan zî vera nê qirkerdişî vera beno pîlêr û dewam keno. Îqtîdarê AKP-MHPyî pê hesîya ke kurdî ver bi azadîye şinê coka Planê Çinkerdişî vist dewre. Ma têkoşînê xo Kurdîstan de kenê la ma pêro şaran têkoşîn kenê. Coka no şer şerêko pîl o.

Wa çew hêrişanê vera Zap, Metîna û Avaşînî sey hêrişanê verênan nêvîno. Armancê nê hêrişan tasfîyekerdişê PKKyî û qirkerdişê kurdan o. Nê hêrişî bitehluke û cidî yê. Ganî 4 parçeyanê Kurdîstanî de û teberê welatî de şarê ma pê na raştîye biheso. Wa şarê ma yê Başûrî, roşnvîr, hunermend û hêzê Başûrî zî naye hol bizanê. Wa çew nêvajo ke gerîlayî hê bi çêrî şer kenê, tehlukeyêk çin o. 

Wa her kes bizano ke PKK vera tehlukeyêkê pîlî şer keno. Eke PKK qels bibo her kes do derbe biwero, destkewteyê kurdan do destî ra şorê, kurdî do bêrê qirkerdene. Tayî vanê 'Gerîlayî hê derban danê Tirkîya ro, ê do sey Garê ser bikewê' û têna şerê gerîlayan seyr kenê. Her kes vano 'gerîlayî şer kenê, bes o.' Yanî wezîfeyanê xo mîyan keno.

Xora gerîlayî hê şer kenê la wezîfeyê şarê ma, hêzanê demokrasî, hêzê sosyalîst û şorişgêrî yo ke paştî bidê gerîlayan, hetê gerîlayan de ca bigêrê û gerîlayan rê ardim bikerê. Eke wina bo derbê pîlî do bêrê dayene dewleta tirke ro, tehluke do biqedo û kurdî do azad bibê.

Nika şarê ma yê Rojawanî vera hêrişan payan ser o yo. Ganî pêro kesî nê tewirî esas bigêrê. Ganî şarê ma yê Vakurî zî wurzo payan ser, wa têna gerîlayan sey mekero. 

Dewleta tirke nika Başûr îşxal kena, vana 'Mûsil û Kerkûk ê ma yê.' Yanî destkewteyê Başûrî binê tehlukeyî de yê. Şar, roşnvîr, hunermend, sîyasetmedar, rêxistinê sivîlî yê Başûrî wa vera îşxalî vinderê. Wa têna nêvajê 'gerîlayî hê şer kenê', wa qeraran bigêrê û bîyarê ca. Hema Başûrî ra qet yew partî, dezgehî vera hêrişanê îşxalî eşkerayîyêke nêdaye. 

Şarê ma yê teberê welatî wa vera hêrişan her ca de têbigêro.Gerîlayî têna seba Vakurî nê seba pêro parçeyanê Kurdîstanî şer kenê coka wa sere de cinî û ciwanî pêro kurdî wezîfeyê xo bîyarê ca, wurzê payan ser.

Dewleta tirke kamca de kurdî estê hêrişê uca kena. Eke dewleta tirke naye xo rê kena esas wa kurdî zî her ca de hêrişê tirkan bikerê. Nika dişmen hêrişê destkewteyanê kurdan keno. Ganî şarê ma ney qebul nêkero û seba ameyox, estbîyayîşê xo wezîfeyanê xo bîyaro ca.