Hemserekê Konseya Rayberdişî ya KCKyî Cemîl Bayikî beşdarê bernameyê Stêrk TVyî bi û rojdem ercna. Qiseykerdişê Bayikî ra beşêk wina yo:

''Rayber Apo têna rayberê kurdan nê rayberê şaran, rayberê azadî û demokrasîyî yo. Ey tim seba yewîya şarê kurdî têkoşîn kerd. Rayber Apoyî pêvînayîşê xo yê telefonî de waşt ke yewîya neteweyî ya kurdan wa bêra caardene. Çunke o zaneno ke seba ke kurdî bin nêkewê ganî bibê yew. Rayber Apoyî tehlukeyê meseleya Zînî Wertê zî dî û hîşyarîya xo kerde. Coka vat kurdî bibê yew, dîyalogan bikerê û waşt ke vera dişmenan kurdî pîya tekoşîn bikerê. Şarê ma û dostê şarê ma zî nêwazenê ke kurdî vera yewbînan şer bikerê. Verê cû KNKyî, dostanê ma yê danîmarkayîjan, hunermend, partî dezgeh û roşnvîranê kurdan zî seba ke birakûjîyêk nêqewimîyo waştişê xo ardî ziwan. Ma hûrmetê nê waştişan kenê û wazenê ke nê waştişan bîyarê ca. Ma têna wazenê ke kurdî vera yewbînan şer mekerê, yewîya kurdan bêra caardene û ma pîya vera dişmenan şer bikerê.

Roje roja yewîye ya, naye ra fîrazêr çîyêk çin o. Ganî PDK meseleya Zînî Wertê mevisno erey. Alozîya Zînî Wertê hema nêqedîyaye. Eşkera nîyo ke na mesele key çareser bena yan zî mabênê kurdan de pêkewtişêk biqewimîyo yan ney. Heqê ma çin o ke ma şarê kurdî mîyanê krîzî de ca verdê. Ganî na alozîye bêra qedînayene. Ganî ma waştişê şarê kurdî bîyarê ca. Şarê kurdî zî wazeno ke pêro hêzî abigêrê pozîsyonanê xo yê verênan. Pêro hêzê kurdî ganî nê waştişî xo rê sey esas bigêro. Ma vera kesî nîyê û ma nêwazenê kes asteng zî bikerê. Ma nêwazenê ke kesayet, partî û dezgehê kurdan waştişê dişmenan bîyarê ca, seba waştişê dişmenan bibê zemînêk.

Rayber Apoyî vera fikrê 'Wa ê mi bo qijkek bo' yo. Çunke fikrê qijkek û asanî xizmetê şarê kurdî nêkenê , xizmetê dişmenî kenê. Tay kesî eşîr, dîn, mezheb yan zî partîya xo ser o têgêrenê. Nê nêzdîbîyayîşî ra nêtîceyêke nêna girewtene. Tay kesî vanê ke Başûr ê nînan o. No nêzdîbîyayîş xizmetê kurdan nêkeno. Ganî Kurdîstan seba her kesî warêko azad bo. Coka Rayber Apoyî vat ke kurdî îtîfaqê xo wa xurt bikerê. Rayber Apo kesayetêko tek o ke seba Rojhelatê Mîyanênî fikirîyeno, çareserîyan pêşnîyaz keno. Rayber Apoyî paradîgmayêke pêşkêşê şaranê Rojhelatê Mîyanênî û merdimîye kerde. Coka sere de şarê kurdî şarê dinya dormeyê ey de yenê pêser. Meseleyê Rojhelatê Mîyanênî têna pê paradîgmaya Rayber Apoyî çareser benê.

Dewleta tirke destpêkî ra nata vera kurdan polîtîkaya qirkerdişî ana ca. Na dewlete zî faşîst a, qirker a. Dewlete kurdî, çerkezî, armenîyî, elewîyî û êzidîyî qir kerdî. Nika zî heman polîtîka Rojawan de ana ca. Dewleta tirke Rojawan, Sûrîye îşxal kena. Demografîya Rojawanî vurnena. Verê çimanê her kesî de na bêexlaqîye kena. Êyê ke Tirkîya qels vînenê, wazenê ke seba menfaatanê xo Tirkîya ra çîyêk bigêrê zî îmkanan danê dewlete û nê kerdişan pey goş kenê. Coka nê kesî zî berpirsîyarê na polîtîkaya qirkerdişî yê. Şarê ma vera nê kerdişan vejîyeno. La ganî kurdî û hêzê demokrasîyî raştîya na dewlete hol fam bikerê. Na dewlete nakokîyanê dewletan ra îstîfade kena û qirkerdişan kena. Ganî şarê kurdî û hêzê demokrasîyî ney hol fam bikerê û vera ci bivejîyê. Eke nika vera ci nêvejîyê no yena a mana ke nînan raştîya dewleta tirke fam nêkerda.

Ewro Rojhelatê Mîyanênî de dewletê pîlî yê ke wayîrê teknolojî, çekan û pereyî yê nêeşkenê netîceyêke bivisnê destî. Çunke şarê Rojhelatê Mîyanênî şîyar benê, seba demokrasî û azadîye têkoşîn kenê. Naye ra pey zî ê do nê têkoşînî aver berê. Dewletê pîlî nêeşkenê nê têkoşînî asteng bikerê.''