Hemserekê Konseya Rayberdişî ya KCK’yî Cemîl Bayikî vat, Leyla Guvene û xoverdayîşo ke hetê aye ra serkêşîya ci ame kerdene kayê dewleta Tirkî veng vetî û vat, ganî her Kurd netîceyêkê xurtî eşkerayîyanê aye yê xurtan ra vejo.
Hemserekê Konseya Rayberdişî ya KCK’yî Cemîl Bayik vizêr şan de bi meymanê programê Rojeva Welat ê Stêrk TV’yî û cewabê persan dayî. Bayikî nê vatî:
“Sere de ez şexsê Leyla Guveen de heme çalakwanê ke grevê vêşanî yê zîndananê Tirkîya û Vakûrê Kurdistanî de yê, yê ke Hewlêr, Silêmanîye, Strasbourg, Galler, Kanada, Hollanda, Almanya, Şengal û Rojava de yê silam kena, hurmetê xo înan rê ramojnena. Nê çalakîyê ke yenê viraştene tena seba şarê Kurdî seba temamê merdimîye yê, seba temamê hêzanê demokrasî û azadîye yê. Ez çalakîya înan de serkewtiş wazena.
Dewleta Tirkî şexsê Rayber Apoyî de hemverê temamê cimatê Kurdî, cimatê Tirkîya û merdimîye de tecrîdî bica ana. Naye ra çalakîya hemverê tecrîdî tarîxkî ya. Her kes vano ‘waştişê Leyla Guvene waştişê ma yo.’ La dewleta Tirkî, îqtîdarê AKP-MHP’yî goş nêdano nê waştişan û kayan kay kenê. Wazenê ke bi kay û komployan netîce bigîrê. Nê kayî hetê cimatê Kurdî ra û hetê cimatê mîyanneteweyîyî ra yenê zanayene û rîyê faşîzmê înan hîna zaf eşkera beno. Înan birayê Rayber Apoyî şirawit verê ci û bi nê hawayî waşt ke Leyla Guvene ra vajê pêvînayîş virazîya hendî fek çalakîya xo ra vera bide. Kay bi nê hawayî bi, waştêne ke bi Leyla Guvene bidê qebûlkerdene.
Eke Leyla Guvene nê qebûl bikero, fek çalakîye ra vera bido, o wext eşkayêne hêrişê çalakwananê bînan ê zîndanan bikerê, tayênan bikişê, bi nê hawayî peynîya ci biyarê. Labelê Leyla Guvene û hemeyê çalakwanan vat ke ‘No nêno a mana ke tecrîd wedarîyayo, naye ra do çalakîya ma dewam bikero.’ Bi nê hawayî nê kayê înan netîceyêk nêda, veng vejîya. Dewleta Tirkî de seba şerê psîkolojîkî merkezêko taybet esto. Nê merkezî reyna waşt ke bi taktîkêkê winayênî netîce bigîro, hesabê xo kerdî. La hesabê înan nêgirewtî. Netîce hetêk verdê rîyê înan o rastekîn hîna eşkera vejîya werte. Kayê înan bin kewt.
Her ke şino wareyê mîyanneteweyîyî de meseleyê Kurdan rindêr yena famkerdene. Seba ke her ke şîyêne dorme înan rê teng bîyêne na rey zî kewtî kayêkê bînî mîyan û Leyla Guvene veradaye. Waşt ke vajê ‘Leyla Guvene amî veradayene, hendî îhtîyacî bi çalakîyan çinêya. No zî kayêk bi. Leyla Guvene û hemeyê çalakwanan nê kayî fam kerd. Naye ran o kay zî veng vejîya. Nê ra zî fam beno ke ganî dewleta Tirkî hendî fek kaykerdişê kayan ra vera bido.’
Şarê Kurdî dewleta Tirkî bi serran o ke rind fam kerda, êyê ke dewleta Tirkî tam nas nêkenê hêtê Tirkîya yê, şarê bînî yê Tirkîya yê. Bi nê çalakîyan rastîya dewleta Tirkî hîna eşkera vejîyaye meydan. Naye ra çende şino her kes nerazîbîyayîşê xo hemverê Erdogan-Bahçelîyî de ano ziwan. Naye ra kîşta Leyla Guvene de xeylî çalakwanê ke zîndanan de yê û teber de yê zî ca gênê, paştî danê ci. Wina aseno ke çende şino do no têgêrayîş hîna bibo pîl, paştdayîşê ci hîna bibo pîl.
Êyê ke hemverê tecrîdkerdişê Rayber Apoyî de vejênê hîna zaf cinî yê. Pêroyê şarê Kurdî hemverê tecrîdî de vindeno, la êyê ke nê rê serkêşîye kenê tim cinî yê. No zî ruh dano temamê cimatî, temamê cinîyan ê ke teberê Kurdistanî de yê, dano hêzanê demokrasî û yê azadîye. Mesela Lubnan de keynekêk wexto ke Rayber Apo ame esîrkerdene çalakîye viraşte. Ancî gama ke dewleta Tirkî hêrişê giranî serê Kurdan, têgêrayîş û Rayber Apoyî de kerdêne Zîlane Dêrsim de çalakîya xo viraşte. Sewbîna zî Vîyana ke keynayêka Silêmanîyeyije bîye hemverê komplo û tecrîdî de bi bedenê xo vinderte. Leyla Guvene zî înan temsîl kena.
Leyla Guvene zî eşkerayîyanê xo de ard ziwan ke a hem xoverdayîşanê zîndanî ke ameybî kerdene û hem zî xoverdayîşanê teberî ameybî bicaardene xo rê esas gêna. Vat, ‘Nê rayîrî de bedelo ke do bêro dayene ez do bidî, ez ci ra nêremena. Heta ke tecrîdê serê Rayber Apoyî wedarîyo ez do çalakîya xo bidomnî.’ Heme çalakwananê bînan zî nê vat. Mesela Nasir Yagizî zî wina vat. Çalakwananê cayanê bînan zî no ard ziwan. Dimayo ke Leyla Guvene vejîyaye qiseykerdişêko zaf xurt kerd. Vat, ‘Seba ma şerm o ke Rayber Apo bi nê hawayî hewna tecrîd de bimano. Ma heme şexsê Rayber Apoyî de tecrîdî de bimanê no nêno qebûlkerdene. No seba ma şermêko pîl o.’
Rayber Apo zî wexto ken ewe dest pêkerd vat, ‘No hal nêno qebûlkerdene, seba ma û seba merdimîye no hal şermêko pîl o. Mi zihîfî û kêmasîya xo ra şerm kerd.’ Seba ke şerm kerd a zihîfîye mîyanê xo ra wedarte, şexsîyetêko pîl xo de viraşt. Wina aseno ke Leyla Guvene o rind fam kerdo. Aye sîyasetê serê Rayber Apoyî, sîyaserê serê şarê Kurdî rind fam kerdo.
Ganî ma zî xo nê şermî ra bixelisnê û hemverê sîyasetê çinkerdişê de mucadele bide. Merdim hendî nêeşkeno sîyasetê Erdogan-Bahçelîyî yo ke serê şarê Kurdî de rayra benê qebûl bikero. Ê zulm kenê, heqaret kenê û hemeyê sîlehan Kurdan ser o şuxulnenê. Seba Kurdan cuyêka winayêne heram a. Ganî Kurdî naye rind fam bikerê. Ganî bivînê ke halo ke tede yê halêkê şermî yo. Eke şerm bikero eşkeno xo mîyanê nê ra vejo, a game eşkeno hemverê sîyasetê faşîst, îşxalkar û çinêkerdişî de vindero. A game eşkeno xo bipawo, bi nasname, ziwan, kultur û erjanê xo bi hawayêkê azad biciwîyo.
