Hemserekê Konseya Rayberdişî ya KCKyî Cemîl Bayikî bi wesîleya serrgêra Hemleya 15ê Tebaxe ANFyî rê qisey kerd.

Bayîkî vat: ''Çend şino holêr yeno fehmkerdene ke  Hemleya 15ê Tebaxe semedê tarîxê şarê kurdî senî muhîm a. Na hemle karekterê komelkî yê kurdan de bedilnayîşê pîlî afernayî. Erjê newe û rindî kerdî mîyanê erjanê kurdan ke taybetîyê komelkî yê şarê kurdî jîhatêr û rindêr kerdî. Netîceya naye de ewro kurdî Rojhelatê Mîyanênî de semedê heme merdimîye erjêko berz ê. Eşkerayo ke 15ê Tebaxe têna semedê kurdan nê semedê heme şaranê Rojhelatê Mîyanênî bedilnayîşê muhîmî afernayî. Ewro Rojhelatê Mîyanênî qet îqtîdarêk nêeşkeno payra bimano ke vera têkoşînê şarî têşîyeno.

Hemleya 15ê Tebexe cuya sîyasal û komelkî ser o tesîro pîl kerd. Senî Kurdîstan, Tirkîya û Rojhelatê Mîyanênî tesîr pîl kerd, PKKyî ser o zî tesîro pîl kerd ke fikr û karekterê ci vetî werte. Îmtîhano tewr pîl ê PKKyî no bi ke xo îspat kerd. Prosesê nê têkoşînî de kêmayî û qîynêkerdişî bibî zî  proseso tarxî yo bingeyên no yo ke PKK kerd PKK ke Kurdîstan de tarîxê neweyî dest pêkerd.  Bi na hemleye şarî qedexerê xo girewt destê xo.

Faşîzmê 12ê Êlule vera hemleya tarîxî ya Apîyîyan dest pê hêrişê pîlî yê qoqkendişî kerd. Hêrişo tewr pîl zî zîndanan de vera tepişteyana ameyêne kerdene. Bêşik o ke kadroyanê rayberan ê PKKyî vera nê hêrişan bi kesayet û nasnameyê PKKyî cewab dayêne ke no cewab zaf muhîm bi. Xora tewirê kurdanê ke vejîyayî Ewropa û Rojhelatê Mîyanênî zî muhîm bi. Faşîzmê 12ê Êlule xeylêk rêxistînî vila kerd ke îradeyê înan şikna. Hînî wina yew zanayîş estbi ke vera nê hêrişan çew/e nêeşkeno payra bimano. Tayînan vatêne ke PKK zî nêeşkena vara nê hêrişan payra bimano. Eke cewabê hêrişanê qirkerdişî yê 12ê Êlule nêameyêne dayene kurdî qirkerdişî ra nêxelisîyayêne. Rayber Apo vano  îxtîmalo qickek bi zî vervejîyayîşê qirkerdişî  berpirsîyarîya tarîxî ya. Eke kurdî wazenê biciwîyê ganî vera nê hêrişî vejîyê. Sey qerar û îradeyê cuya hemle ameye oganîzekerdene û caardene.

Hemleya 15ê Tebaxe îradeyê ciwîyayîşî yê kurdan û îradeyê estbîyayîşê PKKyî ramojna. PKK bi hemleya gerîlayan vat ez do est bê û sey partîya ke sozê ke dayo şar û şehîdanê xo ana ca, semedê domnayîşê estbîyayîşê xo Hemleya 15ê Tebaxe daye destpêkerdene û bi des serran o bi qeraranê winayênan heta ewro ame. Na hemla yena manaya dekewtişê şerê girdî. Rayraberdiş zî hende destpêkerdişî zehmet bi. Rayraberdişê hemle muhîm bi. Dişmenî vatêne emrê ci hîrê rojî yo la PKK bîyî gerîla, gerîla zî bi PKK ke verê ci nîno girewtene.

Pîya bi 15ê Tebaxe rewşa têkoşînî yê herêmkî û mîyanneteweyî hîna zelal bîyî. NATO ke verî sey rêxistinkerde vera ma bi, eşkera vejîyaye vera ma.  Nimûneyê naye yo tewr pîl zî kiştişê Olof Palme eştî PKKyî ser ke wa meşruyetê têkoşînê ma binate ra bêro wedaritene. Reyna Almanya embazê ma tepiştî û sey endamê rêxistina têrorî Dusseldorf de ronişitşê înan kerdî.

Bêşik o ke PKK raştîya dewleta tirke vete meydan. Ercnayîşê Rayberîya Partîya ma yê derheqê na babete de tim balkeş ê. Xora nê ercnayîşan PKK kerd serkewte.

Bitaybetî raştî, ruh û tewirê Fermandar Edîgî fehmkediş zaf muhîm o. Rojane ya Fermandaro Pîl Mahsum Korkmaz-Egîdî de yeno fehmkerden ke o senî fermandaro pîl o. Têna gerîla nê ganî heme kurdî nê rojane biwanî.  Rayber Apo wexto ke Egîdî ercneno vano 'mi rayêk va, şi kerd' ke bale anceno ke senî merdimê wezîfeyî yo. Kesayetê fermandarîye bi cumleyêke kilmvate keno. Fermandar Egîd temerkuzê  azadîya Kurdîstan û şarê kurdî bibe. Rayber Apo sey fermandarîya gerîlayan tim Egîdî sey nimûne ramojneno. Seba ke serkewtişê pîlêr berê destfînayene netîceyan çirey qîymkerde nêvîneno û aye ra  xeylêk rey vato ke no şer gêreno fermandarê/a xo.

Reyna pîya bi Egîdî kesayetê Kemal Pîrî zî sey nimûne dano. Raşta zî kesayetê Kemal Pîrî  eşkeyêne hezar gerîlayan sey hêzê se hezaran bido şerkerdene. Eke Kemal Pîr nêameyêne tepiştene miheqeq têkoşînê gerîlayan hîna rew destpêkerdene û averşîyayîşê ci cîya bîne. Bêşik o ke badê Egîdî xeylêk fermandaran keda pîle daye û no  têkoşîn aver berd. Xeta Egîdî de averşîyayîş serkewtiş ano. Coka ganî Egîd raşt bêro fehmkerdene û sey nimûne bêro girewtene. Egîdî bêîmkanîye de hemle daye destpêkerdene. Demek kî gerîla nêgêreno îmkanan. Bêîmkanîye xo rê keno sebebê estbîyayîşî.

Dostanê PKKyî zî bawer nêkerdêne ke PKK vera hêrişê qirkerdişî payra bimano. Şorişgêrî û kesayetê tarîxî çîyo ke ê bînî tira bawer nêkenê, tira bawer kenê û anê ca. Ewro dişmen bi heme hêzê xo hêriş keno ke gerîla û têkoşînê azadîye bienciqno. Îrade û ruhê têkoşînê Heftanînî ganî bêrê pîlkerdene û vera hêrişê qirkerdişê dişmenî yê vera kurdan dişmenî rê bêro ramojnayene ke kurdî do tim û tim est bê. Nika vera nê dişmenî wext wextê kesayetê Egîdî ramojnayîş o. Xora gerîlayî vera hêrişan bi hawayêkê fedayî xover danê û ramojnenê ke ê xeta Egîdî de aver şinê. Têkoşînê gerîlayan do xeta Egîdî de bêmabên dewam bikero û miheqeq ser bikewo.''