Hemserekê Konseya Raydberdişî ya KCKyî Cemîl Bayikî tewrê 'Bernameyê Taybetî' yê Stêrk TVyî bi û rojdem ercna. Qiseykerdişê Bayikî ra beşêk wina yo:

Hêrişê qirkerdişî têkoşînê ma xurtêr kenê

''Hêrişê vera Mexmûr, Şingal û Herêmanê Pawitişî yê Medya pabesteyê konseptê qirkerdişî yê. Pê nê hêrişan vera têgêrayîşê ma, şarê ma hêrişanê neweyan kenê. Ganî her kes bizano ke nê hêrişan ra dima hêrişê neweyî do bêrê kerdene. Ganî şarê ma her ca de hîşyar bo. Nê hêrişî armanc kenê ke îradeyê ma bişiknê. La nê do bibê sebeb ke ma îrade û têkoşînê xo xurtêr bikerê. Kesî vera nê hêrişan vengê xo nêveti ne Amerîka ne Neteweyanê Yewbîyayeyan ne zî Ewropa. Tîya ra yeno famkerdene ke nê hêzan destûr da Tirkîya ke hêriş bikera.  Xora Mexmûr binê pawitişê NYyî de yo, warê hewayî zî Iraq û Amerîka kontrol kenê. Nê hêrişan ra Amerîka, NY, Hukmatê Iraqî û ê Başûrî mesuldar ê. Heqê şarê ma yo ke înan ra nê çîyan biperso. Nê hêrişî şexsê pêro kurdan de ameyî kerdene. PKK nasname, azadî û kerametê kurdan temsîl keno. Coka hêrişê PKKyî kenê. PKK vera qirkerdişan vindeno. 

Şehadetê embaz Kasim Engînî ma do biaçarnê hamleyêke

Ez keyeyê embaz Kasim Engînî rê û pêro şarê Kurdîstanî rê serweşîye wazena. Embaz Kasimî partî û şarê Kurdîstanî rê kedêka pîle daye, tim xeta Rayber Apoyî de xo newe kerd. Temamîya cuya xo daye partî, şarê kurdî û xeta Rayber Apoyî. Embaz Kasimî warê perwerde, îdeolojîk, şer û îdareyî da ca girewt. Embaz Kasimî vera Qirkerdişê Mereşî, Terteleyê Dêrsimî pê kîn û hêrsî xeta Rayber Apoyî de têkoşîn kerd. Ma do armanc, waştiş û hêvîyanê embaz Kasimî do bîyarê ca, ma do şehadetê ci bikerê hamleyêke. Ganî ciwanê Mereş, Dêrsim, Semsûr, Dîlok, Meletî, Xarpêt têkoşînê Kasim Engînî xo rê bikerê esas. 

'Eke kermê dare dare ra nêbo na dare nêkewena'

Kurdan de qiseyêk esto vano 'Eke kermê dare dare ra nêbo na dare nêkewena.' Kurdan tim şer kerd, bedelî dayî, zehmetîye ante. La tim zî derbe werde. Çunke mîyanê kurdan de bêbextîye ameye kerdene. Dewlete tim waşt kurdan parçe bikera. Mîyanê kurdan de ajanîye, aver berde. Şarê ma yê Başûrî zî tim bedelî pîlî dayî, têkoşîn kerd û tay destkewteyî vistî destî. Nê destkewteyî hetê PKKyî ra ameyî pawitene. MÎT pê rayîrê ajankerdişê şarî Başûrê Kurdîstanî de qirkerdişan keno. Başûr de tay rêxistinê îstîxbaratî estê ke hetkarîya MÎTî kenê. Rîyê nê dezgehan, rêxistinan ra gerîlayê ma benê şehîd.  Nê kesî derheqê gerîlayan de zanayîşan danê MÎT. Tay hemwelatîyî estê ke pabesteyê partîya xo ya YNK-PDKyî yê. Wexto ke selahîyetdarê înan biwazê, derheqê gerîlayan de zanayîşê  danê. La nêzanenê ke nê zanayîşî şinê destê MÎTî. Na bêbextî ya. Ma heta nika sabir kerd. Ma waşt ke rêxistinê Başûrê tedbîrê xo bigêrê. La kifş o ke nê rêxistinan wina nêkerd. Ma nê kesan tesbît bikerê. Dima wa çew nêvajo PKK merdimanê ma kişeno. Eke nêwazenê ma wina bikerê ganî wayîrê merdimanê xo bivejîyê, nêverde ke çew bêbextî bikero. Kamê ke gonîya gerîlayan do birejnê do bibê hedefê ma. Seba PKK esas o ke hesabê bêbextî biperso. Ma nêeşkenê pê xiyanetî biciwîyê. Ganî çew wayîrê xayînan nêvejîyo. Ganî şarê ma yê Başûrî wayîrê rûmet, şeref û kurdayetîya xo bivejîyo. Vengdayîşê ma nê esasî ser o yo.

Ma do heta peynî vera  nîjadperestîye vinderê

Îqtîdar wazeno kurdayetî werte ra wedaro. Vano kes muzîkê kurdkî goştarî nêkero, deyîran nêvajo, kurdkî qisey nêkero, nameyanê kurdkî nêxebitno. Vera cenazayan hêriş yeno kerdene, cenazayê gerîlayan yenê diznayene. Nîjadperestîya ke vera kurdan yena kerdene, dinya de nêdîyaya. Şarê ma vera na nîjadperestîye xo ver dano, bedelanê neweyan dano, her roje dej anceno. Ma do heta peynî vera na nîjadperestîye vinderê. 

Ganî Swêd pêro kurdan û PKKyî ra uzrê xo biwazo

Kişîyayîşê Palmeyî ra dima kurdî ameyî krîmînalîzekerdene, PKK gêrîya mîyanê lîsteya 'terorî.' Ganî Swêd pêro kurdan û PKKyî ra uzrê xo biwazo. Ganî Ewropa PKK lîsteya terorî ra biveja. Ez ê sîyasetmedar û roşnvîranê Swêdî ra sipas kena ke vanê ganî Swêd ma ra uzrê xo biwazo. 

Yewbîyayîşê şaran do peynîya  îqtîdarê faşîstî bîyaro

Kamê ke xizmetê AKP-MHPyî nêkenê sey ajan, bêbext yenê dîyene. Muxalîf, demokratî zî sey dişmenê Tirkîya yenê dîyene. Nika seba ke PKK vera faşîzm vindeno, têkoşîn keno PKK kenê hedef. Kamê ke dostanîya PKKyî kenê, yenê tepiştene, kiştene. Tirkîya seba ke kurdan qir bikera kena ke şarê Tirkîya bibê dişmenê kurdan. Na stratejîyêk a. Seba ke PKK na stratejî tay çin kerde sey tehluke yeno dîyene. PKK û  şarê kurdî hêz û paştî danê demokrat, sosyalîstanê Tirkîya. Ê zî dostanîya kurdan kenê. Key mabênê şarê kurdî û şaranê Tirkîya de yewî, îtîfaq û hemparî bêrê awankerdene hukmo faşîst hînî do nêeşko biciwîyo.

Hêzê HDPyî ra tersenê

Ê averşîyayîşê HDPyî de mergê xo vînenê. HDP partîyêka Tirkîya ya.AKP-MHP wazeno Tirkîya de sîstemo faşîst bêro ronayene. Nê sîstemî de wazenê têna AKP, MHP û CHP wa estbê. Labelê HDP bi xetêka hîrêyîne ya Tirkîya. HDPyî ra berî kes nêeşkeno sîyaset de netîce bigêro. HDP muxalefetêko raştikên o. CHP sey partîya muxalefetî nîya, coka muxalîfî verê xo danê HDP. Wazenê verê HDPyî bêro girewtene. AKP-MHP wazenê komel bêtesîr bikero. No bi taybetî prosesê Korona de ame dîyene.  Ganî şarê Tirkîya û şarê kurdî naye qebul nêkerê. Cinî, ciwan, şarê kurdî vera neheqîyan, kiştişan wa vinderê, sereyê xo wedarê, metersê. Eke wina nêbo faşîzm do ca bibo. Nika îmkanî estê ke merdimî vera ney bigêrê. Coka ganî ciwan û cinîyî rayberîya ney bikerê, ruh bidê komelî. Eke wina bibo rejîm nêeşkeno payan ser  vindero.''