Hemserekê Konseya Rayberdişî ya KCKyî Cemîl Bayikî Bernameyê Taybetî yê Stêrk TVyî de rojdem ercna. Qiseykerdişê Bayikî ra tay noqtayê girîngî wina yê:

''Dinya de nimûneyêka sey Komployê Mîyanneteweyî yo bîn çin o. La Rayber Apoyî no komplo bi giranî ercna û bi paradîgmaya xo komplo pûç kerd. Rayber Apo vera komployî Îmrali de tewirêko xurt mojna. Gerîlayan, şarê ma û têgêrayîşê ma zî nê tewirî ra hêz girewt û xoverdayîşê xo rê dewam kerd. 

Hêzanê mîyanneteweyîyan û dewleta tirke seba ke şarê kurdî bêtesîr bikerê û bêçare war verdê no komplo ard ca. La şarê kurdî, Rayber Apoyî û PKKyî nê armancî teşhîr kerdî û têkoşîn kerd. Ewro hayîya pêro dinya bi meseleya kurdan est a. Tewr peyên dostanê ma Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye daya destpêkerdene. Na hemle mojnena ke hînî meseleya kurdan pêro dinya eleqedar kena. 

Hêzê komplogerî, dewleta tirke û hemkarê xayînî seba ke Rayber Apoyî çin bikerê tecrîdê mutleqî kenê. La Rayber Apoyî bi paradîgmaya xo, xo resna pêro dinya. Na hemle zî îsbatê ney o. Hînî qet yew hêz nêeşkeno verê azadîya Rayber Apoyî bigêro. Nê prosesî de ganî şarê kurdî bi xurtî wayîrê na hemle vejîyo û hemle pîlêr bikero. Dişmen beno ke armanc bikero ke na hemle pûç bikero. Vera nê armancî wa şarê ma, cinî û ciwanê ma erk û mesuldarîyanê xo bi temamî bikerê. Ganî tewr zaf kurdî, cinî û ciwanê kurdî seba ke deynê xo bidê Rayber Apoyî tewrê na hemle bibê. Rayber Apoyî teyna seba şarê kurdî ney seba pêro şaranê Tirkîya zî têkoşîn kerd. Ewro ganî hêzê demokrasî û sosyalîzmî yê Tirkîya seba aramîya welatê xo vera tecrîdî vengê xo vejê û na hemleya azadîye de cabigêrê.  

Çalakîya fedayîya Anqara propagandaya dewlete 'Ma PKK qedîna' pûç kerde. Bi na çalakîya fedayîye ame dîyene ke dewlete raştîyan nimnena û qels a. Dewleta tirke bi bahaneya çalakîya fedayî ya Anqara hêrişê Rojawanî kena. Xora cara dewlete armanc kerdêne ke Rojawanî îşxal bikera. Dewleta tirke nêeşkena ke bê destûrê NATO û Amerîka nê hêriişan bikera. Dewleta tirke Rojawan de krîteranê merdimatîye binpay kena û sûcanê şerî kena. 

Erdogan dirîtîye keno û wina mojneno ke o wayîrê dewaya Filîstînî vejîyeno. Erdogano ke kurdan qetil keno, filîstînijan rê nêbeno dost. Ganî şarê erebî û filîstînî raştîyan bivîno. Dewleta tirke wazena welatanê ereban hêzanê hegemonan reyde parçe bikera.

Hetê bînî ra ma metodê Hamasî tesdîq nêkenê. La ma ney zî tesdîq nêkenê ke Îsraîl pê bahaneya Hamasî hêrişê şarê Filîstînî bikero. Meseleya Filîstînî bi nê hawayî qetî çareser nêbena. Ganî îsraîlijî û filîstînijî neteweya demokratîke ser de pêbikerê. Meseleyî ancax bi paradîgmaya neteweya demokratîke ya Rayber Apoyî çareser benê.

Nika mabênê gerîlayanê ma û artêşa tirke ya îşxalkere de şerêko pîl qewimîyeno. Dewleta tirke nê şerî de tim kişteyan dana la raştîyan şarî ra nimnena. Dişmen vera gerîlayan tim çekanê qedexeyan û teqaberanê kîmyewîyan şuxilneno. La gerîlayê ma vera nê teknîkê dişmenî zî çalakîyanê serkewteyan kenê. Hetê bînî ra dişmen bi propagandayanê gemarinan keno ke tasfîyeya PKKyî û qirkerdişê şarê kurdî meşrû bikero. 

PDK bi taybetî keyeyê Barzanîyan hemkarîya dewleta tirke kenê. Metîna, Girê Cûdî, Avaşîn de PDK dişmenî rê ardim keno. Ganî şarê ma hesabê nê îxanetî biperso. Xeta PDKyî şarê ma rê ney dişmenî rê xizmet keno. PDKyî hêrişê vera Ofîsê KNKyî yê Hewlêrî şermezar nêkerd la çalakîya fedayî ya Anqara cade şermezar kerde. Çira kiştoxê temsîlkarê KNKyî yê Hewlêrî nêtepişîyenê? Çunke PDK û dewleta tirke pîya têgêrenê. Ganî hukmatê Iraqî zî verê nê polîtîkayan de hişyar bibo. 

Seba ke Rayber Apo azad bibo û şarê ma bibo wayîrê statuyêkî dostanê ma hemleyêke daye destpêkerdene. Ganî ma zî hînî mesuldarîya xo bikerê, na hemle de ca bigêrê û hemle ser bivisnê. Xebata ma ya esase na ya.Ez pê bawer a ke cinî û ciwanî do serkêşîya na hemle bikerê. Ez bi taybetî venga ciwanan dana ke wa vera hêrişanê dişmenî verê xo bidê refanê gerîlayan. Wa ciwanî vera polîtîkayanê şerê taybetî yê sey ferzkerdişê fuhuş, ajanîye, tîryakî ûs. vejîyê. Ciwanî wa xo rêxistin bikerê û Şerê Şarî yê Şorişgêrî de cabigêrê.''