Hemserekê Konseya Rayberdişî ya KCKyî Cemîl Bayikî bi meymanê bernameyêkê taybetî yê Stêrk TVyî û rojdem ercna.

Qiseykerdişê Bayikî ra beşêk wina yo:

''Ez hêverî qurbanê Fermanê 73. bi mînetî yad kena. DAÎŞî armanc kerd ke êzidîyan qir bikero. Xora DAÎŞî tewr zaf dewleta tirke ra hêz grewtene. Ne PDK ne zî Hukmatê Iraqî wayîrê êzidîyan vejîyayî. Çunke goreyê înan êzidîyî şarê înan ra nîyê. Eke gerîlayanê HPG, YPG-YJA ra nêbîyêne êzidîyan felaketêko pîkêr do bidîyêne. Ganî êzidîyî rêxistinîya xo bîyarê ca, yewî û îtîfaqê xo xurtêr bikerê, ganî bizanê ke çareserîya meseleyanê înan ê yê. Ganî her kes zî 3ê tebaxe sey qirkerdişî qebul bikero. Êzidîyî ça de benê wa bibê wa abigêrê Şingal.  

Ez xoverdayoxanê Heftanînî rê selam kena, înan rê hûrmetê xo şawena. Ganî her kes şehîd, îrade, xoverdayîşê Heftanînî sey ê xo bivîno. Gerîlayî Heftanîn de binê şert û mercanê kêman de destanan nusenê. PDK vano 'Eke Tirkîya hêrişê ma bikero sebebê ci PDK yo.' No raşt nîyo. Eke dewleta tirke hêrişê PKKyî kena sebebê ci esta. PKK asteng keno ke şarê kurdî maruzê qirkerdişî bibo. Derheqê PKKyî de Başûr de tay raporî ameyî amade kerdene. Wazenê nê raporan pêşkêşê parlamento bikerê û nînan ser o sîyaset bikerê. Ez tîya ra nînan hîşyar kena; wa vera PKKyî raporêk amade nêkerê, seba naye game meerzê. PKK do Heftanînî ra nêvejê û têkoşînê xo ra fek vera nêdê. Gerîlayê PKKyî do şarê kurdî û pêro merdimîye heta peynî bipawê. Ê wa vera Tirkîya biran bigêrê. Wa xoverdayîşê ma sey xoverdayîşê xo bivînê. Wa şehîd û çêrê ma sey ê xco bivînê. 

Ma zanenê ke PDK cerg û qoricîyan dewan de ca keno. PDK armanc keno ke nê kesan vera şarê kurdî bido şerkerdene. Şarê Başûrî welatperwer û çêr o. Ê senî vera gerîlayan şer bikerê? Ez şarê ma yê Başûrî hîşyar kena. Bi taybetî şarê ma yê Şêladizê, Deralok, Amedîye wa nê planan de ca megero, wa peyê pereyan de nêvazo. Wa bêrê kişta gerîlayan de ca bigêrê, vera îşxalî vindertê. Wa ciwanê Başûrî tewrê têkoşînê gerîlayan bibê. 

Dewleta tirke seba ke kurdan bi temamî werte ra wedarê bi polîtîkata tacîz û tecawuzî hêrişê cinî û domanênê kurdan kena. Dewleta tirke hêrişê cografya, îradeyê sîyasî, ciwan, cinî û domananê kurdan kena. Hêrişê goranê kurdan kena. Tewr zaf cinîyî benê hedefê dewleta tirke. Cinîyê kurdê yenê tepiştene, înan rê tacîz û tecawuzî yenê kerdene. Şexsê cinîyanê kurdan de wazenê ke îradeyê kurdan teslîm bigêrê. Çunke cinîyê kurdî vera faşîzm, zulm, koletîye vejîyenê. Kurdîstan de leşker, qoricî, selahîyetdarê dînî na polîtîka anê ca. Ganî şarê ma sere de cinîyî bera nê polîtîkayanê dewleta tirke sere wedarê û têkoşîn bikerê. 

Ez şexsê Fermandar Egîdî de Engîn Sîncer, Sînanê Sor û pêro şehîdanê azadîye bi rêzdarî yad kena. Ma sozêko pîl da şehîdanê xo. Ewro êyê ke Heftanîn de şer kenê nê sozî anê ca. Ewro êyê ke Heftanîn de xo ver danê Fermandar Egîd esas gênê. Ê xeta gerîlayan a ke Rayber Apo û embaz Egîdî aver berde, temsîl kenê. Pêro destkewteyê kurdan sayê hamleya 15ê Tebaxe de ameyî destvistene. Hamleya 15ê Tebaxe şorişî kerdî, têkoşînî afernayî. Hamleya 15ê Tebaxe hamleyêka tarîxî ya. Kurdan pê na hamle xo kerd pak. 

Sayê Hamleya 15ê Tebaxe de kurdî her parçe de têkoşîn kenê, yewîya xo anê ca. Na hamle seba pêro Rojhelatê Mîyanênî girîng a. Coka PKK û Rayber Apoyî seba pêro merdimîye bîyî hêvî. Her kesî vatêne qey na hamle wina yew-di saetan de çin bena. La heta ewro zî dewam kena. 

Şarê ma ganî keda Rayber Apo, Fermandar Egîd û şehîdan xo vîrî ra nêkerê. Rayber Apoyî pê kedêka pîle na hamle arde ca. Gerîlayî nê oxirî de şehîd bîyî. Na hamle ra nata gerîlayî destanan nusenê, benê hêvîya merdimîye. Sayê ked û têkoşînê gerîlayan de kurdan rê hûrmet yeno mojnayene. Gerîlayî na hamle ra nata benê xurtêr û pîlêr. Û no do wina dewam bikero. 

Ganî hêzê sey HBDH û YPS têkoşînê xo aver berê û hamleya xo xurtêr bikerê. PKK têgêrayîşê ciwanan o. Gerîlayî zî wina yê. HPG de bi temamî ciwanî estê û ê hê çêrî kenê. Coka bi hezaran şehîdê înan estê. Ez bi na wesîke ciwananê kurdan rê selam kena. Dewlete Kurdîstan de fuhuş, kundox, bêexlaqî, ajanîye, merg û qetilkerdişan ca kena. AKP-MHP zî wina têgêrenê. Ganî ciwanî wayîrê xo û komelî bivejîyê. Ganî ciwanî komel bipawê. Eke wina têbigêrê benê ciwanê Kurdîstanî. Ciwanê kurdî wa her ca de bêrê têhet, 2-3 kesî zî bê wa xo rêxistin bikerê. No wezîfe û heqê înan o. Senî ke ciwananê kurdan Şirnex de sere wedarit ganî ciwanê bînî zî seba ke cinî, doman û komel bipawê sere wedarê. 

Ciwanê kurdî leşkerîye de mirenê. Dewlete vana 'krîzê qelbî, ginayo erd' nêzane se bî sebî. Dewlete ciwananê ma kişena dima bestena alaya xo û yena cenazaya înan kena. Serhed de keyeyêkî no qebul nêkerd. Ez înan rê selam şawena. Ganî vera dişmenî ma wina vinderê.

Wa ciwanê kurdî nêzdîyê çawiş, subay, polîs, MÎT û temsîlkaranê bînan ê dewlete mebê. Wa aşiqê celadê xo mebê, wa celadê xo ra hesab  bipersê. Keyeyî wa wayîrê domananê xo bivejîyê. 

Seba yewîya neteweyîye Rojawan de tay gamî yenê eştene. Nê gamî kamyew esasan ser o yê ma nêzanenê la çîyo winasên esto. Rayber Apoyî bi serran Rojawan de mend, keda daye uca. Nê netîceyê yewîye pêro sayê Rayber Apoyî de bîyî. Şorişê Rojawanî zî sayê paradîgmaya Rayber Apoyî de ame caardene. Coka ganî her kes hêverî Rayber Apoyî rê sipas bikero. Eke şarê Rojawanî herinda ey de sewbîna kesan rê sipas bikerê no raşt nêbeno. Xora şarê Rojawanî bi taybetî cinî û ciwanê Rojawanî naye qebul nêkenê. Çunke ê Rayber Apo esas gênê.

Dewleta tirke têna vera kurdan nê vera pêro Rojhelatê Mîyanênî dişmenîye kena. Dewleta tirke têna tirkî, neteweyê tirkî, kulturê tirkî qebul kena û wazena ke pêro dinya zî têna nînan qebul bikera. Lîbya, Îdlîb, Azerbeycan, Yemen pirrê cerganê tirkan ê. Dewleta tirke tirkan ra ber hêrişê her kesî kena û her ca îşxal kena.

Dewleta tirke Efrîn de Serêkanîyê de dezgehê tirkan awan kena, her çî qedexe kena, talan kena. Dewleta tirke senî Hatayê ereban kerda ê tirkan nika zî Serêkanîyê, Efrîn, Girê Sipî de heman polîtîka ana ca. Dewleta tirke ereban ra tay cergî rêxistin kerdî û dewleta tirke nînan şawena her ca. A şêra ça uca de qirkerişan kena, wahşet kena. 

Erebê ke xeta Omer Muxtar û Kaddafîyî de yê vera îşxalê dewleta tirke xo ver danê. Nê erebî dostê kurdan ê zî. Dewleta tirke têna seba kurdan nê, seba ereban zî tehluke ya. Ganî kurd û erebî pîya vera îşxalê dewleta tirke vinderê. AKP zî hem dişmenê kurdan o hem zî dişmenê tirkan o. Eke kurd û erebî bibê yew, îtîfaq bikerê o çax AKP zî çin beno. Xora cara zaf bîyo qels. Ganî roşnvîr, hunermend û tesîlkarê wijdanî yê ereban tewirê dewleta tirke qebul nêkerê û komelê xo rêxistin bikerê. Ma sena naye tay xebetan kenê. Eke nê xebatî biqedê peynîya AKPyî do bêra û kurd û erebî bi aramî biciwîyê.