Hemserekê Partîya Herêman ê Demokratîkan (DBP) Keskîn Bayindirî ANFyî rê rojdem ercna. Qiseykerdişê Bayindirî ra bêşê wina yo:

''Sewqîyatê leşkerî yê  Zînî Wertê aslê xo de têna bira PDKyî nîya. Qendîl de û Îran de menfaatê kamî estê? Eke ma nê hetî ra biwanê ma vînenê ke barê Tirkîya tede esto. Cara 20 ra zêdêr baregehê Tirkîya Başûrê Kurdîstanî de estê. Nê baregehî binê kontrolî yê PDKyî de yê. Tirkîya xîret kena le na herêma stratejîke Qendîl bivisna binê kontrolê xo. PDK polîtîkaya raşte nêano ca. Ma nêeşkenê ke na polîtîkaya ke menfaat û yewîya şarê kurdî ra dûr a tesdîq bikerê. Ganî alozîya mabênê kurdan ra ma xo bipawê.

Pê Peymana 1982î yewîya neteweyîye amebî armanckerdene. Pê na peymane amebi waştene ke kurdî pêkewtişan ra dûrî bibê. Na peymane de amebi qerardayene ke xelisîyayîşo neteweyî yê kurdan vera polîtîkayanê dişmenan û rejîman pîya şer bikerê û meseleya neteweyîya kurdan bêra çareserkerdene. Na peymane esasê yewîya neteweyîye ser o amebi kerdene. La rixmo ke na peymane ra 40 serrî vîyartî hema zî mabênê kurdan de yewîye nêameye caardene. Coka kurdî herême de vera yewbînan yenê xebitnayene. Birêz Ocalan nê prosesî de seba ke meseleyêke nêqewimîya têgêra û vengdayîşî kerdî. Ganî cade cewabê nê vengdayîşan bêro dayene û erdê Kurdîstanî de yewîya kurdan bêra caardene. Ma paştî danê vengdayîşanê winasênan.

Şarê kurdî wazeno ke pêro partî, hêzê sîyasîyî, dezgehî û kesayetî bêrê pêser û yewîya neteweyî bêra caardene. Derheqê na babete de xebatê ma estê. Ganî pêro menfaatê şexsî bêrê caverdene û seba şarê kurdî ma bêgumanan bêrê têhet.

Birêz Ocalan ganî têna PKKyî reyde nêro ercnayene. Bi taybetî prosesê çareserîye de her kesî hêzê ey dî. Pê vengdayîşê ci prosesê haştîye dest pêkerd, esasê têkoşînê demokrasîyî ameyî eşkerakerdene.  Tirkîya nê prosesî de xîret kena ke pêro muxalîfan bêtesîr bikera. Vera kesanê ke xo ra bihêzêr ê, tedaya girane kena. Tirkîya pê tecrîdê Ocalanî aslê xo de wazena ke têgêrayîşê sîyasî yê kurdan bêsîyaset bikera, hegemonyaya xo ya vera şarê herême dewam bikera. Wextanê peyênan de zî tedaya xo resnena Efrîn, Başûrê Kurdîstanî, Lîbya. Hetêkî ra zî tecrîdê vera Birêz Ocalanî kena giranêr. Seba aramîya herême ganî cade tecrîd bêro wedaritene û astengîyê vera sîyasetkerdişê Birêz Ocalanî bêrê wedaritene.

Tirkîya bîya esîrê polîtîkayanê şerî. La nê polîtîkayan ra netîceyêke nêgirewte. Her roje xo tekrar kena. Prosesêkê winasênî de ke ekonomî û sîyasetê Tirkîya îflas kerd, welatanê bînan reyde zî meseleyê ci estê. Tersê vînkerdişê îqtîdarê xo ra  nîjadperestî geş kena. Tirkîya pê vatişê 'dişmenîya kurdan muxalîfan zî bêtesîr kena. Tirkîya de zaf perî vera AKPyî muxalafet kenê la wexto ke babete kurdî biba dormeyê îqtîdarî de kom benê.

Tirkîya de krîzo ekonomîk o pîl esto û îqtîdar xîret keno ke terefgîranê xo û sermaye memnûn bikero. Pêro perê ke îqtîdar rexne kenê sey xaîn yenê îlankerdene. Coka zaf muxalîfî vera îqtîdarî têkoşîn nêkenê. Ganî ma rixmê pêro gefan, polîtîkayanê hîşmendîye meseleyan bîyarê rojdem. Ma vera lapêkî bi mîlyonan kesî yê. Ganî ma vera polîtîkayanê 'pare bikere, parçe bikere û îdare bikere' bibê yew. Eke ma sey ciwanan, cinîyan, kedkaran, bindestanê nê welatî pîya bixebitê ma eşkenê nê zulmî rê vajê ney.''