Merkezê Îrtîbatî û Çapemenîye yê HPGyî derheqê çalakîyanê gerîlayan de bi eşkerayîyêke agahîyî dayî. Eşkerayîye wina ya:

''Gerîlayê Azadîye yê Kurdîstanî pê çalakîyanê taktîkselan, performansê şerî yê bitesîrî û asta berze ya xoverdayîşî dekewenê serra 18. ya Hemleya 1ê Hezîrane. Hêzanê ma çalakîyanê selamkerdişê Hemleya 1ê Hezîrane de bi temamî 18 îşxalkerî ceza kerdî, 6 îşxalkerî birîndar kerdî. Ma seba ke qesasê şehîdanê xo bigêrê, Kurdîstan de rayîr nêdê îşxalkeran û ser bikewê do pê ruhê Hemleya 1ê Hezîrane têkoşînê xo rê dewam bikerê.

Detayê çalakîyanê hêzanê ma wina yê:

Çarçewa Hemleya Şorişgêre ya Bazanê Zagrosî de;

Hêzanê ma yê gerîlayan 24ê gulane de warê Dola Maranî yê Avaşînî de yewinêka îşxalkeran girewte binê kontrolê xo û vera înan çalakîyêke kerde. Gerîlayan pê çekanê ferdîyan mesafeya nêzdî ra 3 îşxalkerî ceza kerdî. Dima şewe wexto ke îşxalkerî ameyî yewca pê taktîkê sabotajî îşxalkerî ameyî pirodayene. Na çalakîye de zî 10 îşxalkerî ameyî cezakerdene, 4 îşxalkerî zî birîndar bîyî. Di çalakîyan de bi temamî 13 îşxalkerî ameyî cezakerdene û 4 îşxalkerî birîndar bîyî.

31ê gulane de îşxalkerê ke warê Mervanosî yê Avaşînî ra ver bi Tabura Ereban şîyêne gêrîyayî binê kontrolê hêzanê ma û nêmroje ra pey ameyî pirodayene. Çalakîye de 3 îşxalkerî ameyî cezakerdene, 2 îşxalkerî birîndar bîyî. îşxalkerî panîk bîyî û erazî ra vejîyayî. Hêzanê ma yê YJA-Starî heman roje da nê îşxalkeran ro. La semedo ke erazî de şewat vejîya hûmara kişte û birîndaran nêameye tesbîtkerdene.

31ê gulane de warê Xeregolî yê Zapî de vera îşxalkeran pê çekanê giranan çalakîyêke ameye kerdene. Na çalakîye de yew îşxalker ame cezakerdene.

1ê hezîrane de saete 10.00 de Girê Şehîd Mervanî yê Zapî de vera îşxalkeran çalakîya sûîkastî ameye kerdene. Çalakîye de yew îşxalker ame cezakerdene.

Dewleta tirke waranê sivîlan dana bombayan ver

Dewleta tirke ya îşxalkere warê Garê, Zap, Avaşîn û Metîna û warê sivîlî yê Başûrê Kurdîstanî pê helîkopteran û teyarayanê şerî dayî bombayan ver. Hetê bînî ra zî leşkerê xo yê waran vurnayî.

Detayê hêrişan wina yê:

31ê gulane de dewa Ergenê ya qezaya Çemankê ya Dihokî 3 reyî, warê Dirê, Gelîya Basya, Girê Sorî, Kartal çend reyî dîyayî bombayan ver.

31ê gulane de şan îşxalkeran waranê Mamreşo û Mervanosî yê Avaşînî de hêzê xo pê helîkopteran vurnayî û warê Banista de zî leşkerê xo ardî war.

31ê gulane de şewe warê Tabura Ereban ê Avaşînî 8 reyî dîya bombayan ver. Heman roje şan Qela Bêdewê, Herfa Tyî û Ciloyê Qijî de helîkopterî perrayî. Waranê Şehîd Serxwebûnî, Qela Bêdewê û Şehîd Mervanî de îşxalkeran hêzê xo pê helîkopteran vurnayî û Ciloyo Qij zî da bombayan ver.

1ê hezîrane de Girê Zendûra yê Metîna dîya bombayan ver.

Nê bombardumanan de zerarêk nêresa hêzanê ma ser. La şewatê ke netîceya nê bombardumanan de qewimîyayê hema zî dewam kenê.''