Gerîlayê HPGyî Zeynel Gozubuyuko ke Semsûr de şehîd bi hetê keyeyê ci ra cenazaya ci ameye girewtene. Ne wesayîtê cenaza ameye dayene û ne zî destur dîya ke camî de cenaza bêro şutene.

Artêşa tirke 7ê gulane de herêma Korê ya  Semsûrî de hêrişê hewayî kerdbi û gerîlayê HGPyî Zeynel Alakuş, Gafarî Yorulmaz û Zeynel Gozubuyuk şehîd bibî. Cenazayî ameyî berdene Dezgehê Tibê Edlî yê Meletî. Cenazayê Alakuş û Yorulmazî 14ê gulane de ameyî girewtene. Her di keyeyan rê zî wesayîtê cenaza nêameyî dayene. Alakuş dewa Tolmezî ya Semsûrî de Yorulmaz zî dewa Gomîkî Çamyurî yê bajarî de ameybî definkerdene. Polîsan û leşkeran destûr nêdabi ke her di cenazeyî zî bêrê şutene.

Zeynel Gozubuyuko ke eynî hêrişî de şehîd kewt cenazaya ci ewro ameye definkerdene. Reyna hetê şaredarîye ra wesayîtê cenaza nêame dayene. Keyeyî bi îmkananê xo cenazaya xo berdê dewa Malê Bava ya Semsûrî. Leşkeranê  tirkî ke destur nêda cenaza camî de bêro şutene goristan girewt binê ablûqa û destur nêda bê keyeyê ci kesêk/e şiro goristan. Badê cenaza destur nêdîya ke keye dewe de tehzîye rone.