Fermandaranê Hêzanê Pawitişê Cinîyan (HPJ) ra Berfîne Denîz hêrişê îşxalî yê dewleta tirke yê vera Kurdîstanî û xoverdayîşê gerîlayan ê vera îşxalî ANFyî rê ercnayî.

Berfîne Denîz ard ziwan ke dewleta tirke pê pêro teknîk û îmkananê xo hêrişê têgêrayîşê azadîye kena û vat: ''Pê rayîrê nê hêrişan Tirkîya wazena kurdan û têgêrayîşê azadîye çin bikerê. Coka her hetî ra xo seferber kerd. Bi taybetî kombîyayîşê NATOyî ra dima no eşkera bi. Gerîlayê azadîye vera nê hêrişan bi hawayêkê bêhempayî têkoşîn kenê.

Xoverdayîşê gerîlayan ê Herêmanê Pawitişî yê Medya mojneno ke êyê ke Kurdîstanî pawenê gerîla yê. Gerîlayî nika pê felsefe û îdeolojîya Rayber apoyî çeperan de şer kenê. Gerîlayî Rojhelatê Mîyanênî rê bîyî sembol. Xoverdayîşê gerîlayan ma zî payan ser o vindarneno, beno çimeyê îstîfakerdişî. Xoverdayîşê gerîlayanê azadîye yê Kurdîstanî yê vera îşxalê dewleta tirke seba pêro Kurdîstanî tecrubeyêko girîng o. Ma eşkenê goreyê tecrubeyanê înan xo rêxistin bikerê. Wextê ci nîyo ke ma biewnîyê peyê xo ra. Ganî ma vera îşxalî pîya têkoşîn bikerê.''