Hemserekê KODARî Fûad Bêrîtane ANFyî rê qisey kerd û seba wayîrvejîyayîşê tewrê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' veng da.

Qiseykerdişê Fûad Bêrîtanî ra tay qismê girîngî wina yê:

''Mîyanê tradîsyonê xoverdayîşî de raştîya kurdan est a. Kurdan tim vera tedayan xo ver da û sere wedaritbi. Coka kurdî babeta serkêşîye de zî zanaye yê. Mabênê Rayberîye û şarê ma de têkilîyêka xurte est a. Rayber Apo heyf ke destê dişmenî de esîr o. Dişmen seba ke îradeyê şarê ma bişikno Rayber Apoyî tecrîd keno û komelî ra dûrî visneno. 

Wayîrvejîyayîşê Rayber Apoyî bi caardişê fikranê ey beno. Wayîrvejîyayîşê Rayber Apoyî wayîrvejîyayîşê xo yo; karê seba azadîya Rayberîye karê azadîya xo yo.

Ganî bêro dîyene ke Rayber Apoyî tim cuya azade de israr kerdêne. Sîstemê tecrîd û îşkenceyî yê Îmraliyî nîşaneya zulmî ya. No sîstemêko winayên o ke estbîyayîşê merdiman çin keno. Rayber Apo vera nê sîstemî tim xo ver dano. Ey mîyanê şertanê Îmraliyî de paradîgmaya xo afernaye.

Seba azadîya Rayberîye tewr peyêne Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' hetê dostanê ma ra her cayê dinya de amebî îlankerdene. Ganî cinî, ciwan û şarê Rojhelatê Kurdîstanî û şarê Îranî her ca de tewrê na hemle bibê. Ganî Şorişê 'Jin, Jiyan, Azadî' bi na hemle derbazê safhayêka bîne bibo. Naye ser o ganî her kes tewrê na hemle bibo û wayîrê na hemle vejîyo.''