Akademîsyen û sîyasetmedar Kamîran Berwarîyî hêrişanê îşxalî yê dewleta tirke yê vera Başûrê Kurdîstanî ser o qisey kerd.

Berwarîyî pare kerd ke binkewtişanê Garê û Heftanînî ra dima cara dewleta tirke amadekarîya nê hêrişan kerdêne. Serrgêra Qirkerdişê Armenîyan de dewleta tirke nê hêrişî dayî destpêkerdene. Bi nê hawayî mesaj da Amerîka ke ê eşkenê kurdan zî qetil bikerê. Operasyonê vera Zap, Metîna û Avaşînî  hîra yo. 400-500 kesî nê operasyonî de ca gênê. Dewleta tirke wazena hem Başûr hem zî Vakurî ra hêriş bikera û Başûrê Kurdîstanî îşxal bikera. Reyna îsbat bi ke dewleta tirke nê operasyonî de gazê kîmyewî şuxilnena. Tirkîya wazena 12 cayanê stratejîka îşxal bikera û mabênê Berwarî û Doskî de têkilîye bibirna. Binkewtişê Garê û Heftanînî ra dima çimê dinya de qîymetê Tirkîya nêmend. Hînî Tirkîya nêeşkena ça biwaza îşxal bikera.''

Berwarîyî îfade kerd ke şarê Kurdîstanî wayîrê felsefe û îdeolojîya Abdullah Ocalanî vejîyeno û wina dewam kerd: ''Şarê Kurdîsyanî modelê KCKyî tesdîq keno û hetê gerîlayan de ca gêno. Şarê Başûrî estbîyayîşê gerîlayan sey estbîyayîşê xo vîneno. Coka wext wextê azadîya Abdullah Ocalanî yo û PKK lîsteya terorî ra vetiş o. KNK rewî ra Başûrê Kurdîstanî de seba yewîya neteweyîye xebatan keno. Ganî prosesê nê hêrişan de îdareyê Başûrî vera îşxalî tewirê xo bimojno.''

Berwarîyî da zanayene ke Şingal tim hedefê Tirkîya, Iraq û hêzanê herêmîyan de yo û vat: ''Nê hezî wazenê verî îradeyê Şingalî çin bikerê, destkewteyanê Rojawanî çin bikerê û dima zî pêro Kurdîstan de qirkerdiş bikerê. Coka ganî her kes wayîrê Şingal vejîyo. Nê hêzî wazenê Modelê Konfederalîzmê Demokratîkî yê Kurdîstanî çin bikerê û kurdan qels bikerê. Sîyasetê kurdan eşkeno yewîya xo awan bikero û verê nê hêrişan vejîyo.''