Hemsereka Konseya Rayberdişî ya KCKyî Besê Xozat cewab da persanê Medya Haber TVyî.

Qiseykerdişê Besê Xozat ra tayê noqtayê girîngî wina yê:

''Emser Hemleya 'Rayber Apoyî rê Azadîye, Meseleya Kurdan rê Çareserîye' morê xo da şayîyanê serrgêra ronîyayîşê PKKyî ro. Ancî 25ê Teşrîna Peyêne cinîyan meydanî dekerdî û azadîya Rayber Apoyî waşte. Cinîyî û pêro dinya wayîrê têkoşînê seba azadîya Rayber Apoyî vejîyenê. Xora Rayber Apoyî kedêka pîle daye têkoşînê azadîya cinîyan. Ganî cinîyî hîna zaf seba azadîya Rayber Apoyî û serkewtişê Hemleya Azadîye têkoşîn bikerê. 

Ancî şarê ma mîtînganê Êlihî û Kolnî de mesajê xo bi zelalî dayî. Ganî lingê dîplomatîk û komelkîyan ê hemle bi giranî bêrê caardene. Îmrali de tecrîd dewam keno. A raşte qiseykerdiş û eşkerayîyê Devlet Bahçelîyî zî seba normalîzekerdişê tecrîdî yê. Xora ma eşkenê vajê ke Bahçelîyî estbîyayîşê kurdan, muxatabîya Rayber Apoyî û tecrîd qebul kerdê. Nê çîyî zî netîceya têkoşînê şarê ma û têgêrayîşê ma de bîyê. Yanî înan fekê xo de raştîyî qebul kerdî la pratîk de çîyêk nêkerd. Dewlete ha kena ke bi qiseyanê xo şarê ma bixapîna û polîtîkayanê qirkerdişî rê dewam bikera. Dewlete û îqtîdar kenê ke şarê ma, komel, muxalîfî û rayaumûmîya demokratîke tecrîdî normalîze bikerê, bimusê ci. Ganî çew bi ney mexapîyo. Ganî ma tecrîdî tim rojdem bikerê, seba azadîya Rayber Apoyî û çareserîya meseleya kurdan rê zemînî amade bikerê. Wa sistîye nêba. Ez venga her kesî dana ke tewrê Hemleya Azadîye bibo, nê esasî ser o têkoşînî pîlêr bikero.

2015 ra nata dewlete bi giranî hêrişê şarê ma, Rayber Apoyî, gerîlayan, Rojawan, Başûr û têgêrayîşê ma kena. La vera nê hêrişan zî xoverdayîşêko pîl ame kerdene. Nika Rojhelatê Mîyanênî de rewşa newîye est a; Şerê Dinya yo Hîrêyên. Coka dewleta tirke sîyasetê zere û teberî de teng bîya. Dewleta tirke û îqtîdarê AKP-MHPyî hê panîk de yê. Seba ke PKK nê halî de ser nêkewo, kurdî wayîrê destkewteyan nêbê îqtîdar û dewlete planan kenê. Nîyetê înan çin o ke çareserîye bîyarê ca. Dewlete ha kena ke şarê kurdî hêvîdar bikera, bi nîqaşanê serê çareserîye têkoşîn qels bikera. 

Xora nîyetê înan çareserîye bibîyêne qeyûmî tayînê şaredarîyanê ma nêkerdêne. Polîtîkayê qeyûmî parçeyê polîtîkayanê qirkerdişî yê. Şarê kurdî bi israrî qeyûman qebul nêkeno la dewlete bi israrî îradeyê şarî çin hesibnena. Ganî şarê ma mîyanê nê nîqaşanê çareserîye de xoverdayîşê xo sist nêkero. Wa têkoşîn bêro pîlkerdene 

Rojawan û Sûrîye de dewleta tirke hêrişê cergan organîze û aktîf kerdî. Aya ke binê nameyê OSOyî de Sûrîye şer kena, artêşa tirke bi xo ya. Nê cergê HTŞyî, El Nûsra, DAÎŞî ûsn bi destê dewleta tirke ameyî perwerdekerdene. Tesadûfî nîya ke Îsraîlî vatbi ke Sûrîye hedefê înan de ya û dewleta tirke zî vatbi ke eleqeyê ci yê bi Sûrîye nêmenda. Nê zûr ê. Dewleta tirke ha Sûrîye de bi cerganê xo qirkerdiş kena. 

Dewleta tirke Mîsaki Mîllî ra, îşxalê Heleb, Sûrîye û Rojawanî ra fek vera nêdayo. Aseno ke mabênê Amerîka, Îsraîl û Tirkîya de yew îtîfaq est o. Ne Sûrîye ne zî Hêzê Koalîsyonî mudaxeleyê hêrişan nêkenê. Aseno ke şerê Sûrîye vilayê pêro Rojawanî bibo. Ganî şarê ma vera nê şerî xoverdayîşê topekûnî bikero. Xora Îdareyê Xoserî zî seferberîye îlan kerda. Wa çew erdê xo terk nêkero, hetê hêzanê YPG, YPJ, QSDyî de şer bikero. 

Nika vera şarê ma tehlukeyê qirkerdişî est o. Şarê Helebî a raşte xoverdayîşêko bêhempa kerd. Wa her kes hetê nê xoverdayîşî de bibo. Ez venga pêro kantonan û şaranê Rojawanî dana ke xo ver bidê. Ancî Vakurê Kurdîstanî de, Başûr de, Ewropa de, Tirkîya de wa şarê ma wurzo payan ser û xoverdayîşî pîlêr bikero.

Gerîlayê ma vera hêrişanê dewleta tirke têkoşînê xo pîlêr kenê û dewleta tirke Zap de kilîd kenê. Coka dewleta tirke verê xo da Rojawanî. Nê şerî do dewleta tirke rê çare nêba. Dewlete ver bi rijîyayîşî şina û seba felate ganî meseleya kurdan çareser bikera.

Dewleta Îranî zî kena ke bi cezayanê îdamî çimê cinîyan û komelî bitersna. La vera rejîmê Îranî xoverdayîş û têkoşînê cinîyan benê pîlêr. Cinîyî wa bi xurtî tewrê kampanyaya KJARî bibê û vera biranê îdamê Pexşane Ezîzî, Werîşê Muradî û ê bînan vejîyê.

London de polîsanê îngilîzan eşto merkezê kurdan ser. Asno ke Îngilîstan paştî dano polîtîkayanê dewleta tirke. Îngilîstan seba ke Tirkîya ra menfaet bikero nê hêrişanê gemarinan keno. Şarê ma wa ney qebul nêkero, bi xurtî xo ver bido. Wa her kes paştî bido xoverdayîşê verê KCCyî. Wa têkilîya Îngilîstan-Tirkîya ya gemarine bêra teşhîrkerdene.''