Hemsereka Konseya Rayberdişî ya KCKyî Besê Xozat bi wesîleya serrgêra Komployê 9ê Teşrîna Verêne ya 1998î ANFyî rê qisey kerd.

Qiseykerdişê Besê Xozat ra tay noqtayê girîngî wina yê:

''Polîtîkaya tecrîdî dewamê Komployê Mîyanneteweyîyî û israrê qirkerdişê kurdan o. Bi tecrîdî yeno armanckerdene e Rayber Apo, têgêrayîşê azadîye û şarê kurdî teslîm bibê. Sîstemê Îmraliyî hêzanê komplogeran ra azade nîyo. Dewleta tirke 25 serrî yo qanûnanê xo binpay kena û destûr nêdana pêvînayîşanê bi Rayber Apoyî. Dewleta tirke bi bahaneyanê cezaya dîsîplînî vera kena ke tecrîdî giranêr bikera. dewleta tirke bi nê tecrîd-îşkenceyî kena ke îradeyê xoverdayîşê kurdan bişikna û hêvîya kurdan çin bikera. Rayber Apo îradeyê kurdan û adresê çareserîya meseleya kurdan. Hêrişê vera Rayber Apoyî hêrişê vera kurdan ê.

Sîstemê tecrîdî yê Îmraliyî merkezê polîtîkaya qirkerdişê kurdan o. Dewleta tirke tecrîdî vera kurdan sey hacetê şantajî şuxilnena. Xora nê tecrîdî reyde dewleta tirke û îqtîdarê AKP-MHPyî Kurdîstan û Tirkîya de tedaya vera komelî zî zêdînaye. Îqtîdarê AKP-MHPyî yo faşîst seba ke kurdî tira fayde nêvînê huqûq û demokrasî asteng kenê. 

Nê 25 serran de tecrîdê Îmraliyî Tirkîya arde verê rijîyayîşî. Tecrîdî reyde meseleya kurdan bîya xorinêr, demokrasî û huqûq ameyî çinkerdene, şar xizan bîyo, krîzê welatî giran bîyî. Dewleta tirke çimeyê şarî şerê vera kurdan de xerc kerdî. Dewleta tirke nê 25 serran de kerd ke pê tecrîdî şarê kurdî û Rayber Apoyî teslîm bigêra la nêeşkaye.  Xoverdayîşê Rayber Apoyî bi komelkî û global. Rayber Apoyî Îmrali vurna merkezêkê xoverdayîşî. No şarê ma û têgêrayîşê ma rê zî bi moral. Têgêrayîşê ma û şarê ma xeta nê xoverdayîşî de erjê pîlî vistî destî, Şorişê Rojawanî kerd. 

Xoverdayîşo ke dormeyê Rayber Apoyî de yeno kerdene armancê hêzanê komplogeran zî pûç kerdî. Bi taybetî şerê vera DAÎŞî ra dima kurdî hetê dinya ra şinasîyayî û dostanîyê neweyî viraştî. Peynîya 25 serran de şarî û cinîyî ser kewtî. Têkoşînê azadîye bi pîlêr û global. Dewleta tirke û hêzê komplogerî zî bin kewtî. Dişmenîya vera kurdan çimê dewleta tirke kor kerdî. La 25 serran de kurdî aver şîyî. Hêzanê komplogeran nê 25 serran de tim xîret kerd ke têgêrayîşê ma tasfîye bikerê. Coka înan tim paştî daye sîstemê tecrîd û îşkenceyî yê Îmraliyî. 

Xoverdayîşê Îmraliyî Rayber Apoyî xoverdayîşêko îdeolojîk, sîyasî û komelkî yo. Rayber Apo seba ke azadî û demokrasî pawitêne bi komployî teslîmê dewleta tirke ame kerdene. Rayber Apo seba ke erjanê merdimatîye paweno binê tecrîdî de yo. La o reyna zî bi eşqê azadîye xo ver dano. Rayber Apo ronayoxê paradîgmaya Sîstemê Konfederalî yo. Şorişê Rojawanî îsbatê na paradîgma yo. Paradîgmaya ey ewnîyayîşêko raşt da sosyalîzmî ke ewro dinya na paradîgma ser o nîqaşan kena û wayîra ci vejîyena.''