Bi wesîleya serrgêra 2. ya  xespkerdişê Şaredarîyanê Bajaran ê Pîlan ê Amed, Mêrdîn û Wanî yê ke hetê Partîya Demokratîke ya Şaran (HDP) ra ameyêne îdarekerdene, Rêxistina HDPyî ya Wanî de eşkerayîya çapemenîye ameye dayene. Serekwekîla Koma HDPyî Merale Daniş Beştaş, wekîlî, hemşaredarê ke wezîfeyê înan ameyî xespkerdene û xeylêk kesî tewrê eşkerayîye bîyî.

Hemserekê HDPyî yê Wanî Fîkret Doganî ard ziwan ke badê qeyûman şaredarîye açarîyayî qereqolan û vat înan sond  wendo ke do qeyûman peyser bişawê.

Serekwekîla Koma HDPyî Merale Daniş Beştaş zî bi selamkerdişê hemşaredaran ê ke tepişteyê dest pê qiseykerdişê xo kerd û nê vatî: ''Hemşaredarê tepişte nê rehîn ê. Bîlasebeb merdimê ke îradeyê şarî temsîl kenê û raştîyan vanê tepiştê eştê pê dêsan. Nika her hetê Tirkîya qeyûmî rê yeno teslîmkerdene. Ma vatbi 'eke ma vengê xo mevejê welat do rejîmê qeyûmî rê bêro teslîmkerdene.' Ewro ê tersê ma yenê ca. Têna şaredarîyanê ma de qeyûm ca nêkerd, qeyûmê ke şaredarîyan de ameyî cakerdene herinda înan de zî qeyûm ame cakerdene. Têna Nisêbîn de 4 rey qeyûm bedilya. Seba ke zafêr dizdîye bikerî qeyûman bedilnenê. Xora eke wezîrê înan ke pê tewreyan pereyî diznayî biameyêne cezakerdene,  qeyûman zî dizdîye nêkerdêne. Sedat Peker tim dizdîya înan fîneno çiman ver la qet yew dozger cipêrsayîş nêdano destpêkerdene. Cunke hukm binê kontrolê îqtîdarî de yo. Badê nê îqtîdarî do nê sûcî bêrê cipêrsayene û ma zî do tewrê nê mehkemeyan bibê.

Qeyûmî qet nêşarmîyenî xo sey serekwekîlanê şaredarîyan ramojnenê. Şima nê şarî temsîl nêkenê. Têna pawitoxîya şaredarîyan kenê. Ma şima nas nêkenê. Şima dest na mal, mulk û piranê şarî ser. Qeyûmî îradeyê şarê kurdî nas nêkenê, dişmenîya înan a vera kurdan merheleya tewr berze de ya. Cunke AKP û MHP dişmenîya kurdan ser o ameyî ronayene. Qeyûm talan û rijnayîş o. Bajarê ke tede qeyûm ameyo cakerdene de dîzdîye yena kerdene, rant esto.

Bedîa Ozgokçe û Selçuk Mizrakli wekîl bê û Ahmet Turk serekê şaredarî bi û derheqê înan de qerarê mehkumîyetî çînêbi. Pê zûran propagandaya sîyaye kerde, bîlasebeb herinda înan de qeyûmî cakerdî. Kadîr Topbaş û Melîh Gokçek karî ra ameyî girewtene la herinda înan de endamê meclîsê şaredarî ameyî cakerdene. La şaredarîyê ke ê HDP û kurdan ê înan de cade qeyûm yeno cakerdene. Îqtîdaro darbekar no yo. Ganî cade qeyûmî peyser bêrê antene. Ma sey şarî çirey qeyûmî nas nêkedî ma do nas nêkero zî. Ma zanê ke qeyûmî dişmenê tarîx, kultur, xoza, ziwanê şarê ma yê. Dişmenîya vera kurdan newî nîya. Şima se kenê bikerê, şima do meeşkê nê şarî rê çok bidê dayene. Ma pîya bi şarê xo do ser bikewê. HDP hêvî ya, hêvî sereberz payra ya.''