Serekwekîla Koma HDPyî Merale Daniş Beştaş derheqê destsernayîşê wekilîyanê Leyla Guven û Musa Farisogullariyî de qisey kerd û vat: ''Weçînayîşê 7ê hezîrana 2015î de partîya ma nêverda ke AKP têna bibo îqtîdar. Na darbe zî seke dewamê darbeya 4ê teşrîna peyêna 2016î ya ke Hemserekê Pêroyî yê HDPyî ameyî destbendkerdene. Verê ma de awanîyêka hukmatê darbekerî esta.''

Beştaşe ard ziwan ke ganî Leyla Guven nêameyêne destbendkerdene û vat: ''Ma do ney qet qebul nêkerê, şima zî mekerê. Çend hêrişê ma kenê hende benê qels. Armanc kenê ke HDP wels bikerê, têkilîya HDPyî komelî reyde cîya bikerê. Nika ra hêzê HDPyî yê ameyoxî vînenê û xîret kenê ke ney asteng bikerê.Ma şar ê, ma şarî reyde têkoşîn kenê. Vanê ke HDP hêzê xo çara gêno. Ma heqdar ê û seba dewayêka heqdare xebitîyenê. Ma vanê kurdan rê azadî, Tirkîya rê demokrasî. Ganî pêro heqê şarê kurdî  sey ê hemwelatîyanê bînan têdûşt bêrê qebulkerdene. Ma nê esasî ser o heqdar ê.''

Beştaşe da zanayene ke merdimî nêeşkenê  pê darbeyan û faşîzmî pêkerdiş bîyarê ca û vat: ''Ma vera darbeyan qet teslîm nêbîyî. Ma do têkoşînê xo pîlêr bikerê. Xora bernameyê ma yê têkoşînê demokratîkî yê 3 mengan esto. Ma menga verêne viste dewre. Ma do 15ê hezîrane de dest pê rayraşîyayîşan bikerê. Ma do şarî reyde sîyasetê demokratîk û şertanê çareserîye awan bikerê. Waranê ekonomîk, sîyasî, kulturel û cuye de tedaya pîle esta. Vera nînan ma do vatiş, sîyaset, waştişanê xo yê demokratîkan bitesîr bikerê. Vîrusê Korona HDPyî rê tesîr nêkeno. Vîruso pîl û bitehluke îqtîdar o. Ma roniştişê paketa înfazî de zî qala ney zaf kerde. Cîyakerîye her warê cuye de esta, tîya de esta xora. Ê armanc kenê ke muxalefet û terefê bînî yewbînan ra cîya bikerê. No kayêk o û ganî kesêk pê nê kayî nêxapîyo.''