Gerîlayê HPG û YJA STAR'î Botan Mêrdîn, Şêro Serhed û Çîya Rûbare serê tecrîdkerdişê girankerdeyî yê vera Rayberê Şarê Kurdî Abdullah Ocalanî de qisey kerd.

‘SEREK APO ESTBÎYAYÎŞ Û ÇINBÎYAYÎŞÊ MA YO’

Gerîlayê HPG'yî Şêro Serhedî bale ante serê têgêrayîşê bi rayberîya Rayberê Şarê Kurdî Abdullah Ocalanî û vat, “Serek Apo, estbîyayîş û çinbîyayîşê ma yo. Wexto ke merdim tarîxî de nîya bido vîneno ke Başûrê Kurdistanî bi serewedaritişê Şêx Mehmûd Berzencî dest pêkerdo, Vakurê Kurdistanî serewedaritişê Şêx Seîd, Seyîd Rizayî, Rojakewtena Kurdistanî de Komara Mehabadî, tewr peyên zî Rojava de serewedaritişê Amûde û Qamişloyî ameyî kerdene. No serewedaritiş zî persanê yan herêmî ra yan eşîrî, keyeyî û dînî ra vejîyayî. La Serek Apo nê hemeyan rê cîya-cîya bi ruhê neteweyî seba şarê Kurdî û şarê bindestanê hemeyan rê sere wedareno. Coka Rayber Apo seba şarê bindestî, bitaybetî seba şarê Kurdî estbîyayîş û çinbîyayîş o. Ma zanê Rayber Apo ne seba eşîre ne keyeyî, seba Kurdan hemeyan, seba şaranê bindestan sere wedareno.

FIKIR Û FELSEFEYA RAYBER APOYÎ PLANÊ DAGIRKERAN PÛÇ KERDÎ

Gerîla Şêro Serhedî serê tecrîdkerdişê Ocalanî de vat,  “Ewro ma vînenê Rayber Apo 20 serrî yo ke zîndanê Îmraliyî de xo ver ro dano. Xoverrodayşê PKK’yî yo heta nika nîşanê estbîyayîşê eyî yo. Ewro kes nêeşkeno bi tarzê Rayber Apoyî de artêşê sey PKK’yî awan bikero û nameyê Kurdan der û berê cîhanî ra vila bikero. Rayber Apo nasnameyê ma yo. Seba naye ma vanê Rayber Apo pawitoxê herêma Kurdistanî yo. Ma şerwanê Rayber Apoyî, wendekarê Egîdan, Zîlanan, Bêrîtanan eke ko de xo ver ro danê,  no saya Rayber Apoyî de yo. Dişmen zî naye baş zano. Ewro ke çar perçeyanê Kurdistanî de û teberê welatî de eke hêzêk vejîyayo û dişmen nêşkeno winî asan hêriş bikero no saya Rayber Apoyî de yo. Dewleta Tirkî bi nê tecrîdî wazena ke şarê Kurdî û yê bindestî xo rê bikero xulam. La fikir, felsefe û paradîgmaya Rayber Apoyî no plan kerd pûç. Hêzêko sey PKK’yî vejîya meydan.  No tecrîd şexsê Rayber Apoyî de vera şarê bindest û şarê Kurdî rê ameyo kerdene. No semed ra zî ma vanê heta fikir, felsefe û îdolojîya Rayber Apoyî bibo ma mîlîtanê Rayber Apoyî do xo ver ro bidê û şer bikerê.

SEBA KE FIKRANÊ RAYBER APOYÎ RA TERSENÊ, TECRÎDÎ DE ISRAR KENÊ

Gerîlayê HPG'yî Botan Mêrdînî zî vat, “Hêzê mîyanneteweyî bi tecrîdî wazenê mabênê şaranê bindest û şarê Kurdî de sînor virazê. Şar û Rayber Apo yewbînî ra bivisnê. Dewleta Tirkî waşt şar û gerîlayî yewbînî ra bivisîyo. Nê polîtîkayan binge nêgirewt. Seba ke fikir, felsefe û îdeolojîya Rayber Apoyî heqîqet ê. Seba naye zî hêzanê emperyal, dagirker û kapîtalîstan no fikrê Rayber Apoyî qebul nêkerd. Seba ke qebul nêkenê, tecrîdî de israr kenê. Heta nika eşkera bîyo ke vera nê fikrê Rayber Apoyî de nêeşkenê vindê. Wa heme hêzê îqtîdarî baş bizanê ke kes nêeşkeno verê PKK’yî bigêro.”

‘MA HER TIM RAYÎRÊ RAYBER APOYÎ DE ME’

Gerîlaya YJA-STAR'î Çîya Rûbare vat, beno ke Rayberê Şarê Kurdî Abdullah Ocalanî nêvînena la heskerdiş û dilsozîya aye ey rê cîya ya û wina dewam kerd, “Mi hetê fîzîkîyî ra Rayberî nêdîya. Nika amancê min ê ciwîyayîşî; ez wazena serê esasê felsefeya Rayberî û nê têkoşînî de biwana. Ez wazena nê rayîrî de çîyêk bikera û keda mi zî biba. Vatişêkê Rayberî esto, vano, “Seba ke ma eynî eşqî biciwîyê hewca nîyo ke ma eynî wext de  û eynî ca de bêrîme têhet.” Seba naye zî, ma her tim Rayberî reyde yîme.

Seba azadîya Rayberê xo ma cinî her demî rê û her şerî ra amade yîme. Ma seba wezîfe û berpirsîyarîya xo  bîyayîme ca amade yîme.”