Endama Heyetê Îdareyan ê Herêmîyan ê HDPyî û aktîvîsta Têgêrayîşê Cinîyan ê Azadan (TJA) Sevîle Rojbîne Çetîna ke derheqê ci de dewa ameye akerdene, 26ê hezîrane polîsan eşt keyeyê ci ser û a dest bend kerde. Polîsan sereştiş de Çetîne rê îşkence kerd û kutikî verdayî serê ci.

Aktîvîsta TJA Zelale Bîlgîne vera îşkenceyî nêrazîbîyayîşê xo mojna û ard ziwan ke rejîmo faşîst her ke şino asta îşkenceyî keno berzêr û vurna metodê konseptêkê neweyî.

Zelale Bîlgîn vat: ''Qedîyayîşê prosesê haştîye ra dima zere û teber de rejîmê faşîstî konsepteko newe yê şerî da destpêkerdene ke maneno konseptê 12ê êlula 1982î de  yê metodê îşkenceyî yê Esat Oktayî. Çarçewa nê konseptî de merdimî yenê ajankerdene, îstîxbarat merdiman remneno, destnêdayîşê wekîlan yeno wedaritene.

Destbendkerdişê Çetîne ra dima zî polîsan Amed de pê kutikan eştbi keyeyêk ser û kutikî verdayî ferdanê keyeyî ser. Rojbîne Çetîn eke venga ci biameyêne dayene eşkayêne şora îfade bida. La polîsan pê kutikan eşt keyeyê ci ser û pê îşkence a dest bend kerde. Eşkerayîya walîtîye zî kena ke îşkence bêro mîyankerdene. Dewlete kena ke pê îşkence komel pasîf bikera la terso ke ê afirnenê çêrîya ma rijnena û do birijna. Ganî no hol bêro famkerdene. 

Ma kenê ke ziwanê haştîye aver şoro la dewlete ma rê ziwanê şerî ferz kena. Wazena ma zî sey ci ziwanê şerî bixebitnê. Ma do nê zulmî pê xoverdayîşî bişiknê. Ma sey cinîyan nê erdî de haştîye her kesî ra zêdêr pawenê û têkoşîn kenê. Têkoşînê cinîyan tarîxî yo. Pê hêrişanê winasênan ê nêeşkenê îradeyê cinîyan bişiknê.''