Dewa Mîrgî ya qezaya Hezroyî ya Amedî de îqtîdarî dest na axpînanê şarî ser û tede bîrê petrolî akerdî. Petrolo ke tewrê awa şimitişî bena, rîyê ci ra heywanî bi jehrî kewenê û cuya dewijan ser o gef virazîyeno.

Dewijan çend reyî seba ke bîrî bêrê qefilnayene waştişnameyî dayî la cewab nêdîya înan.

Dewijan ra Cîhan Balveyî ard ziwan ke wexto ke bîrê petrolî ame kinitene mazot tewrê awe bîyo. Balveyî vat: ''Ma nêwaştêne ke tîya de nê bîrî bêrê akerdene. Mazot tewrê awe bîyo. Hem heywanê ma hem zî domanê ma binê rîskî de yê. Waştişnameyê ma nênê wendene zî. Heywan û domanî rîskî ra fam nêkenê, kewenê mîyanê awe. Çend heywanê ma nê rojan de bi jehrî kewtî.''

Dewij Mehmet Esenî dîyar kerd ke dewe de qetlîamêk yeno kerdene û vat: ''M xîret kenê ke doman û heywananê xo bipawê la heta cayêk îmkanê ma est ê. Îqtîdarî bê rizaya ma nê bîrî dayî akerdene. No zî samîmeyetê înan eşkera keno. Eke çîyêk bêro sereyê domananê ma mesuldarê ney îqtîdar o. 

Tapuyê ma est ê la rixmê ney zî bi zorî erdê ma destê ma ra ame girewtene. Heywankarîye çimeyê ma yê debarkerdişî yo. La wina şêro ma nêeşkenê heywankarîye bikerê. Şîrketa petrolî wazena ke ma dewe ra veja ke Bîlal Erdogan serkêşîya na şîrkete keno. Dewlete herinda ke erdê ma pêşkêşê sermaye bikera ganî goş bida waştişanê şarî ser.''