Hêrişê dewleta tirke ya îşxalkere û çeteyanê ci yê SMOyî yê vera Awbendê Tişrînî dewam kenê. Dewleta tirke ya îşxalkere  vizêr pê teyarayanê şerî reyna şaro ke Awbendê Tişrînî de nobete tepişeno da bombayan ver. Hêriş de 2ê înan cinîyî 3 sîvîlî birîndar bîyî.

Birîndaran ra Ebdulrehman Şikrî Şekiroyî ard ziwan ke ê do rixmê heme hêrişan paştî bidê QSD û YPJyî û nê vatî: ''Ma semedê paştdayîşê domanan û şervananê xo ameyî. Ma sey şarê sîvîlî Tebqa û Reqa ra ameyî. Ma reyna raştê hêrişî ameyî. No awbendê ma yo. Ganî ma wayîrê şervananê xo û yewbînî bivejê. Şervanê ma, şehîdê ma semedê ma gonîya xo rişnenê, ganê xo feda kenê. QSD erdo xo paweno. Ma zî paştî danê domananê xo. Wa îşxalkerî bizanê ke ma mergî ra nêtersenê. Şima nêeşkenê kurdan bin bifînê, şima do xo bin bikewê.''

Islim Mihemed zî wina vat: ''Ez Kobanê ra ameya. Rîyê nê hêrişan ra awa ma, ceyranê ma birîya. Seba ke hêrişî biqedîyê ma ameyî tîya. Wa heme dinya bivîno ke Erdogan hêrişê kurdan keno. Ma ra çi wazeno? Erdogan ti se kenê bikere şima do çirey vera kurdan ser nêkewê. Dinya de têna yew kurd bimano zî do vera şima xover bido. Awe û ceyranê bi mîlyonan birna. Dewletê mîyanneteweyîyî nê nêvînenê, qey her kes bêveng o?''

Birîndaran ra Hêva Reşo zî ard ziwan ke ê semedê paştdayîşê şervananê QSD û YPJî ameyî û vat: ''Ez Girê Spîyî ra ya, ma paştî danê şervananê xo. Ma vera hêrişan xover danê. Ma birîndar bibê zî, şehîd bibê zî ma do hedefanê xo cameverdê, ma do xoverdayîşê xo bidomnê.''