Wekîlê DEM Partî yê Mersînî Alî Bozanî derheqê Rayraşîyayîşê Azadîye yê Pîlî de ANFyî rê qisey kerd.

Bozanî vist vîrî ke 35 mengan ra nata Rayberê Şarê Kurdî Abdullah Ocalanî ra xeberêke nêna girewtene û vat: ''Rayraşîyayîşê Azadîye yo Pîl parçeyêkê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' yo. Ma roja 5ine ya Rayraşîyayîşê Azadîye yê Pîlî de yê. Rayraşîyayîşê ma baskanê Wan û Qersî ra heta 15ê Sibate do dewam bikero. Rayraşîyayîş hetê 75 kesan ra dîya destpêkerdene la nê 75 kesî bi mîlyonan merdiman temsîl kenê. Guzergehê ma de merdiman tim derheqê tecrîdî de qisey kerd û vera tecrîdî nêrazîbîyayîşê xo mojna. Şarê kurdî Birêz Abdullah Ocalanî sey lîderê xo û muxatabê çareserîya meseleya kurdan qebul keno. Coka ganî berê Îmraliyî bêrê akerdee.

No tecrîdo girankerde ewro tesîrê bii mîlyonan merdiman keno. Îmrali de 25 serrî yoo tecrîd est o. Wexto ke merdim bala xo bido qewimîyayîşanê Rojhelatê Mîyanênî û Tirkîya ser, hînî vîneno ke seba çareserîya meseleyan ganî Birêz Ocalan azad bibo. No rayraşîyayîş teyna seba kurdan nîyo; tecrîdê Îmraliyî tesîrê 85 mîlyonan merdiman keno. Çaresernêkerdişê meseleya kurdan sebebê krîzê ekonomîkî yo zî. Armancê ma teyna wedaritişê tecrîdî nîyo. Armancê ma caardişê azadîya Birêz Abdullah Ocalanî yo. Heta ke rayraşîyayîşê ma bireso armancê xo, heta ke Birêz Abdullah Ocalan azad bibo ma do têkoşînê xo rê dewam bikerê.''