Endamê Konseya Rayberdişî ya KCKyî Xebat Andokî bi wesîleya serrgêra Komployê 9ê Teşrîna Verêne qisey kerd û vat ke vera polîtîkayanê qirkerdişî yê serê şarê kudî mesuldarîya tewr pîle kewena milê cinî û ciwanan ser.
Endamê Konseya Rayberdişî ya KCKyî Xebat Andokî bi wesîleya serrgêra Komployê 9ê Teşrîna Verêne ANFyî rê qisey kerd.
Qiseykerdişê Andokî ra tay noqtayê girîngî wina yê:
''25 serrî verî komplo dîya destpêkerdene û netîceya ci de Rayberê ma ame tecrîdkerdene. 25 serrî yo vera komployî têkoşînêko pîl yeno kerdene. Heta ke ma xo biresnê azadîye û armancê şehîdanê xo ser bivisnê ma do xoverdayîşî rê dewam bikerê. Serê bingeyê xeta serkewtişî de têkoşîn û xoverdayîşê ma do dewam bikero.
Bêguman nê 25 serran de tewr zaf ciwanan û cinîyan vera komployî xo ver da. Xora sîstemo kapîtalîst tewr zaf hêrişê cinî û ciwanan keno û mîyanê komelî de zî tewr zaf cinî û ciwanî bi azadîye bawer kenê. Cinî û ciwanî bi fedayîtî wayîrê xeta Rayberîye vejîyenê. Destpêkê ronîyayîşê partîye ra nata Rayberîye cinî û ciwanan de têkilîyêka xurte naye ro. Rayberîye tim waşt ke ciwanan bikerê serkêş.
Îşxalkerî pê pêro hêzê xo hêrişê şarÊ kurdî kenê la nêeşkenê ser bikewê. Dişmen keno le bi rayîrê xayîn û hemkaranê xo kurdan çin bikerê. La kurdî tim bi ruhêkê fedayîyî xo ver danê. Sîstemo kapîtalîst zî seba çinkerdişê kurdan û têgêrayîşê azadîye paştî dano îşxalkeran. La kurdê azadî bi tewirê ciwanî têkoşîn kenê.
Nê prosesî de rol û erkê girîngî kewenê milê cinî û ciwanan ser. Vera Rayberîye 25 serrî yo tecrîd dewam keno û vera şarê kurdî 100 serrî yo polîtîkaya qirkerdişî dewam kena. Vera nê kerdişan mesuldarîya tewr pîle kewena milê cinî û ciwanan ser. Ganî ciwanê kurdî bi hawayêkê holî cuye analîz bikerê. Tewirê ciwanan do ameyoxê kurdan dîyar bikero. Nê çaxî de îqtîdarê AKP-MHPyî seba ke kurdan qir bikero destê ci ra çi yeno keno û pêro îmkananê xo seferber keno.
Nê hêrişî çarçewa şerî de yenê kerdene. Tay kesî vanê qey teberê koyan de şer çin o. La no feraset şaş o. Dewleta tirke her ca de bi her hawayî hêrişê şarê ma kena. Coka ganî ma bi ruhêkê fedayîyî têbigêrê û verê xo bidê warê xoverdayîşî. Ganî ma wayîrê mîsyon û rolanê xo vejîyê. Serrgêra 26. ya Komployê Mîyanneteweyî de ganî ma komployî çin bikerê. Ez cinî û ciwanan û şarê ma rê serkewtiş wazena.''
