Hemserekê TUHAD-FEDî yê Amedî Kerem Canpolatî ANFyî rê qisey kerd û dîyar kerd ke Îmrali de vera Rayberê Şarê Kurdî Abdullah Ocalanî tecrîdêko giran est o.

Canpolatî da zanayene ke tecrîdî reyde Kurdîstan û Tirkîya de krîzî qewimîyenê. Canpolatî vat: ''Krîzo ekonomîk qewimîyeno û sîyaseto demokratîk teng bîyo. Vera nînan çareya teke wedarîyayîşê tecrîdê Îmraliyî yo. Ma wazenê ke tecrîd biqedo û Adbullah Ocalan azad bibo. Wa sey serra 2013î prosesê çareserîye dest pêbikero.''

Canpolatî vist vîrî ke bi rojdemê tecrîdî 13ê teşrîna verêne de Amed de do mîtîngêko pîl bêro kerdene û vat: ''Ma wazenê a roje Amed de bi se hezaran merdimî bêrê yewca û vera tecrîdî azadîye biwazê. Ê kesê ke haştî û demokrasîyî wazenê ganî tewrê nê mîtîngî bibê. Çunke Ocalan o keso ke eşkeno meseleyan çareser bikero.''

Canpolatî bale ante rewşa zîndanan ser û vat: ''Bi hezaran tepişteyê nêweşî vera nêdîyenê, pêvînayîşê keyeyan yenê astengkerdene, cezayê keyfîyî dîyenê tepişteyan ûsn. Bi taybetî tay tepişteyê nêweşî ganî cade vera bidîyê. Ganî her kes na babete de hîsger bibo û seba tepişteyanê nêweşan vengê xo berz bikero.''