Destûr nêamebi dayene ke gerîlayê HPGyî yo şehîd Serkan Tutak bêro kefenkerdene. Sekreteryaya DÎKî ra mala Fahrî Doganî îfade kerd ke no nêno qebulkerdene û vat ganî merdimê bawermendî semedê nê kerdişî qîyam ronê.
Vakurê Kurdîstanî de zulmê hêzanê dewlete yê vera şehîdgehan û cenazayan nêqedîyenê. Hêzê asayîşî yê dewlete nêrverdanê ke cenazayê gerîlayan pê rîtuelê dînî bêrê definkerdene. Tewr peyêne cenazaya Serkan Tutakî verî ke bêkefen ameye definkerdene û hêzanê dewlete nêverda ke nimajê cenazaya ci zî bêro kerdene.
Sekreteryaya Pêroyî ya Kongreya Îslamê Demokratîkî (DÎK) Fahrî Doganî derheqê babete de qisey kerd. Doganî bale ante hêrişê vera goran ser û îfade kerd ke Îslam de no kerdiş qedexe yo. Doganî vat: ''Her ca de ganî her kes vera nê goran hûrmet bimojno.''
Fahrî Doganî vist vîrî ke cenazayê parçebîyayeyî keyeyan rê yenê dîyene û vat: ''Ganî zerar nêro dayene cenazayan. Îslamîyet de derheqê cenazayan de 4 qayîdeyî estê; ganî cenaza cade bêra şitene, bêra kefenkerdene, dima nimajê ci bêro kerdene û bêra definkerdene. Nê çar qayîdeyî farz-i kîfaye yê. Nê vatişê homayî yê ke ganî bêrê caardene. Eke cenazeyêke wina nêra definkerdene ganî merdimê bawermendî qîyam ronê. Na berpirsîyarîya ma pêroyînan a.''
Fahrî Doganî Serekîya Karanê Dîyanetî rexne kerd û vat: ''Ganî Dîyanet derheqê nê kerdişan de cigêrayîş bikero û nê hêrişkeran hîşyar bikero. Wezîfeyê ci no yo. La Tirkîya de Dîyanet tim binê fermanê îqtîdaran de bi. Ganî Dîyanet derheqê na mesele de eşkerayîyêke bikero û bîyaro ziwan ke nê hêrişê vera cenazayan xelet ê.''
