26ê tebaxe nêzdîyê dewa Bameydanî ya qezaya Farqînî de pêkewtişê vera artêşa tirke ya îşxalkere de 3 gerîlayî şehîd bibî. Nînan ra cenazaya Berxwedan Farqînî (Rahîm Saygi) Farqîn de ameye definkerdene. 

Keyeyê Saygiyî 28ê tebaxe de seba teşhîsê cenaza nimûneya gonîye dabî. Teşhîskerdişî ra dima keyeyî cenazaya gerîlayî girewte û berde Farqînî.

Polîsan Farqîn de noqtaya kontrolî nayî ro û GBTyê her kesî kontrol kerd. Endam û îdarekarê MEBYA-DER, HDP, DBP, Partîya Çep a Keske û aktîvîstê TJA zî GBTyî ra dima derbazê Farqînî bîyî.

Polîsan dormeyê Goristanê Zazo Kenyayî girewt û nêverda ke keyeyî ra ber çew tewrê merasîmê definkerdişî bibo. Girse naye ser o definkerdişî ra dima goristanî ra heta taxe rayîr a şi. 

Hetê bînî ra keyeyê Muhterem Koçî zî seba teşhîskerdişê cenazaya bîne gonîye daye. Rixmê teşhîskerdişî zî cenaza nêdîyaye keyeyî û keye agêra Wanî.

26ê tebaxe de pêkewtişan ra dima dewleta tirke keyeyêko koçer destbend kerdbi. Keyeyî ra R.D. (54) û M.S. (45) vera dîyayî la S.D., H.D. (24), H.D. (28) 'endamîya rêxistine' ra tepişîyabî.