Endamê Komîteya Rayberdişî ya PKKyî Murat Karayilanî kongreya 12ine ya PKKyî de wina qisey kerd:

‘’Kongreya 12ine sey leweyî bi serkewtişî qedîya. Na kongre perspektîfê Rayber Apoyî xorinêr kerdî. Nê esasî ser o nîqaşî ameyî kerdene. Ma na kongre waştişê Rayber Apoyî ser o bi îmkananê xo û şertanê xo kerde. Ma mîyanê hêrişan de kongre kerde. 

Bira feshkerdişê PKKyî taybet a. Rayber Apoyî no îrade vet werte. Xora bira warverdişê çekan birêka asan nêbîye. Ma sey gerîlayan wayîrê tarîxê 41 serran ê. No tarîx bi gonî, şehîd û bedelan nusîya. Ma qasê 35 hezar şehîdî dayî. 10 hezar welatperwerî zî şehîd dayî. Yanî qasê 50 hezar şehîdê ma est ê. Nê şehîdî do tim rêberê ma bibê. PKK partîya şehîdan a. 

Derheqê qedînayîşê stratejîya çekdarî de nîqaşî virazîyayî. Şerê Şarî yê Şorişgêrî de îdîaya ma serkewtiş o. La ma fikirîyenê ke eke Rayber Apo bi israrî prosesêkê neweyî pêşkêş keno tîya de çîyêk est o. Ma leşkerê Rayber Apoyî yê. Ma pawitêne ke dewlete gamêke bierza. La nêeşte. Coka şik, guman zî şima de est ê. Coka nîqaşan de fikrê cîyayî zî vejîyayî werte. La mesajanê Rayber Apoyî astêke de ma îqna kerdî. Coka bira feshkerdişî dîyaye.

Kongreya 12ine kongreya peyên a. Bire dîyaye ke PKK xo fesh bikero û çekan war verdo. Ganî ma vajê ke PKKyî seba kêfî dest nêeşt çekan. Şarê kurdî binê tehlukeyî de bi. Kurdî mecbur mendî ke çekan bigêrê. Ma heta nika bi çekan şarê xo pawit. Coka nê birê kongre birê normalî nîyê. Ma na kongre de sozo ke dayo Rayber Apoyî anê ca. Rayber Apoyî pêvînayîşê xo yê bi keyeyî de vato ke ‘Ez eşkena nê têkoşînî xeta şer û şîdetî ra bianca xeta sîyasî û huqûqîye.’ Naye ser o kongre ameye pêser. 

Naye ra dima ganî dewlete û hukmato nikayên gamanê hewceyan bierzê. Ganî vurîyayîşê qanûnî, îdarî bêrê kerdene. Ma bi stratejîkî nêzdîyê nê prosesî benê. PKK tena gerîlayan ra nêno pê. PKK bi xo şar o. Ganî selahîyetdarê dewlete bi eqlî selîm têbigêrê û şenso ke Rayber Apoyî dayo hol biercnê. 

Ma têrîameyîşî ra amade yê. Ma pêşnîyaz kenê ke wa komîsyonî welatan de ronîyê. Ma zanenê ke ma se kerdo û dewlete se kerdo. Sereyê ma berz û akerde yo. Ma çîyêkî ra zî nêtersenê.

Ganî bizanîyo ke PKKyî seba çareserîye xo fesh kerdo. Naye ra pey ganî dewlete zî seba çareserîye sîyasetê xo yê serê kurdan bivurna. Haştîye tena bi yew terefî nêbena. 

Rayber Apo vano ke no wext wextê xoawankerdişî yo. Seba ke şero çekdar qedîyayo rehetî do nêra. Mesuldarî û erkê ma do dewam bikerê. Ganî şarê ma yo welatperwer bizano ke Rayber Apoyî no proseso tarîxî seba serkewtişî dayo destpêkerdene. Ma xeta Rayber Apoyî de yê û nê esasî ser o proses de rolê xo bîyarê ca. Ma venga pêro embazan zî danê ke wina têbigêrê. Ma do her ca de sosyalîzmê komelkî yê demokratîkî aver berê. 

Xeta Rayber Apoyî de, rêçê şehîdanê qehremanan de ma do netîceyanê pîlan bivisnê destî. Ma pêro embazan rê serkewtiş wazenê û vanê 'Bijî bijî Serok Apo'."