Dîrektor Mensûr Kerîmîyano ke şaristanê Sine yê Rojhelatê Kurdîstanî ra bîyo, hêrişanê îşxalî yê dewleta tirke yê vera Rojawanî de 23yê kanûne de şehîd bibi. Seba ke dewleta Îranî nêverda cenaza Sine de bêra definkerdene, vizêr cenaza şaristanê Silêmanî yê Başûrê Kurdîstanî de ameye definkerdene.

Goristanê Şêx Abbasî de hêverî seba Kerîmîyanî merasîmêk ame kerdene. Tîya de Şerko Heme Emînî nameyê KNKyî ser o mesajê înan wend û vat: ''Şehadetê Kerîmîyanî mojneno ke  qederê kurdan seyci yo. Kerîmîyan Rojhelat de dadîya xo ra bi, Rojawan de şehîd bi û Başûr de ame definkerdene.''

Walîyê Silêmanî Heval Ebûbekîrî zî ard ziwan ke seba ke kurdan yewîya xo nêarda ca ê qels ê.

Merasîm de mesajê Tevgera Azadî, Komunê Fîlmanê Rojawanî, hunermendanê Başûrî û hunermendanê Rojhelatê Kurdîstanî ameyî wendene.

Dima nameyê keyeyê Kerîmîyanî ser o Yunus Kerîmîyanî qisey kerd û vat: ''Ma kerd ke şehîdê ma Sine de bêro definkerdene la dewleta Îranî nêverda. Ma zî cenazaya xo tîya de defin kerde. Çunke Silêmanî û Sine domanê heman dadî yê. A dadîye zî Kurdîstan a.''