Endamê Meclîsê Şaredarîya Sêgirkê yê DEM Partî û îdarekarê partîye Ahmet Gun vizêr dewa Taloka ya qezaya Qilebanî ya Şirnexî de netîceya hêrişê çekdarî de amebi qetilkerdene.

Wexto ke Gun lajê xo Abdurrahîm Gunî reyde şîyêne daristanî raştê hêrişî ame. Gunî cayê serebûtî de dinyaya xo bedilnaye.

Abdurrahîm Gun hêriş de birîndar bi û wedarîya nêweşxaneyê Dewlete yê Şirnexî. Dima vizêr şan Abdurrahîm Gun sewqê Nêweşxaneyê Zanîngehê Dîcle yê Amedî ame kerdene. Dîya zanayene ke Abdurrahîm Gun do amelîyat bibo.

Cenazaya Gunî karanê otopsî ra ameye berdene bi Sêgirkê. Şarê herême, îdarekarê DBP û DEM Partî, Mayê Haştîye û endamê MEBYA-DERî tewrê merasîmê definkerdişî bîyî.

Hemserekê DBPyî yê Qilebanî Abdullah Yamanî definkerdişî ra dima vat: ''Embaz Ahmet merdimêko nefsqij û welatperwer bi. Ey 40 serran xizmetê têkoşînê azadîye kerd. Embazê ma Ahmet hetê dewlete ra kişîya.''

Definkerdişî ra dima şar taxa Tolîgîya de şi serweşîya keyeyê Gunî.