Hêrişê vera goran dewam kenê. Perey zî qezaya Erdîşî ya Wanî de Goristanê Zortulî de gorê gerîlaya YJA-Starî Fatma Încî hetê leşkeran ra ame texrîbkerdene. Kerraya gorê Fatma Încî hetê leşkeran ra ame şiknayene.

Fatma Încî (Amara Serhad) 17ê nîsana 2018î de qezaya Berwarî ya Sêrtî de pêkewtişêk de şehîd bîye.

Goreyê zanayîşan leşkeran bi bahaneya ke serê gorî de nameyê qodî û şehîd nusîyayêne gor texrîb kerd û venga keyeyê Încî da ke qereqol de îfade bido.   

Wake Kadere Încî Yîgît vist vîrî ke înan cenazaya Fatma 8 mengan ra dima girewte û vat: ''Serrêke verê cû ma gorê ci viraşt. Rojêke qereqolî ra venga birayê mi ame dayene. Leşkeran persa ke ma gors viraşt yan nê. Birayê mi zî vat ma viraşt. Dima zî înan persa ke çira serê gorî de ê çîyî nusîyenê. Wexto ke birayê mi qereqol de bi înan vat kerraya gorîhetê leşkeran ra ame cêrakerdene. Birayê mi vera leşkeran nêrazîbîyayîşê xo mojneno. Wexto ke Fatma şehîd bîye ma seba testê DNA 8 mengan pawit. Dima ma eşkîyayî cenazaya waya xo bigêrê. Pêro bawerî û sîstemê huqûqî hûrmetê goran kenê. La Tirkîya de gorê ma texrîb benê, bi mengan cenazayî yenê vindartene. Bi nê hawayî çîyêk nêkeweno destê înan. Kurdî do erjanê xo ra fek vera nêdê. Na polîtîkayêka dewlete ya. Wa destê xo yê gemarinî goranê ma ra biancê.''