14ê êlula 2018î de herêma Kano Marînosî ya qezaya Elkê ya Şirnexî de 5 Gerîlayê Azadîye yê Kurdîstanî şehîd bîyî.

Keyeyê gerîlaya YJA Starî Axîne Seydo (Menfiyat Elçiçek)  2018 de verî Şirnêx de dima ra Colemêrg de semedê testê DNA gonî daye ke cenazaya kênaya xo bîgêro. Rixmê naye cenazaya Axîne Seydo goristanê bêkesan ê Colemêrgî de ameye definkerdene.

29ê teşrîna peyêne de Mudirîya Polîsan a Hakkari xebere daye keyeyî ke cenzaya Axîne Seydo Dezgehê Tibê Edlîyî (ATK) yê Îstanbulî de ya. ATKyî cenazaya Axîne Seydo zereyê qûtîya kartonî de daye keyeyî.

Dayîke Asiye Elçiçek ard ziwan ke ê 5 serrîyo cehd kenê ke cenazaya xo bîgêrî la cenazaya înan zereyê qutîya kartonî de ameye dayene. Asîye Elçiçek no sey metodê îşkenceyî name kerd û vat: ''Ma zaf hêrsbîyayeyê. Ma ra tersenê. Îstanbul cenazaya ma zereyê qutîya kartonî de dîyaye ma. Gama ke ma resayê Adana ma tîya cenazaya xo kefen kerd, kerde tabut û wina berde Hezex. Dejê ma taze yo, hêrsê ma taze yo. Panc serrî yo ez cenazaya kênaya xo pawena. Pawitişî ra zerrîya mi vêşaye bîye tar. Înan zereyê qûtî de daye mi. Hûma cayê înan de meverdo. Gama ke mi zerrîya qutî de cenazaya kênaya xo girewte, ez zaf pê dejaya, hêrs bîya la yew hetê mi zî hol bi. Çunke tay dayîkî hema zî gêrenê esteyanê qijanê xo. Mi cenazaya xo arde keye û sereyê mi berz o. Se kenê wa bikerê ê do meeşkê ma. Ma ra tersenê. Çîyo ke kenê ma, tersê xo ra kenê.''

Hetê bînî ra Hezex de serkêşîya MEBYA-DERî de semedê Axîne Seydo çalakîye ameye kerdene. Bi seyan kesê çatrayîrê nêweşxaneyî de ameyî têhet û ver bi keyeyê Seydoyî rayra şîyî. Rayraşîyayîş de yo ke wekîlê HEDEPî yê Şirnexî Newroze Uysal Aslan û Mehmet Zeki Irmez tewrê bîyî, slogana “Axîn rûmeta me ye” ameye vatene. Badê rayraşîyayîşî wekîlan û îdarekaranê MEBYA-DERî keye zîyaret kerd.