Babîyê çar qijan Mehmet Yildirimo ke vizêr dewa Nenyasî ya qezaya Licê ya Amedî de hetê dewleta tirke ra ame qetilkerdene cenazaya ci hetê keyeyê ci ra ameye girewtene.

Keyeyê  ke heta şan verê Dezgehê Tibê Edlîyî (ATK) yê Dîyarbekirî de lawikî vatî û pawit, saetanê şanî de cenazaya xo girewte. Gama ke cenaza ameye girewtene sloganê sey “Şehîd namirin”, “Bijî Serok Apo” ameyî vatene. Merdimanê Yildirimî cenaza girewte û ver bi dewa Nenyasî kewtî rayîr ke tede amebi qetilkerdene. Sîyasetmedarê DEM Partî û DBP û dezgehê bînî ke paştî danê keyeyî ê zî semedê definkerdişî şîyî dewe.