Gimgim şaristanêkê Kurdîstanî yo ke serewedaritişê Şêx Seîdî de ca girewt. Yeno vatene ke wexto ke hêzanê  kurdan ê pabesteyê Şêx Seîdî Gimgim destê dewleta tirke ya îşxalkere ra girewt alaya xo keyeyê hukmatî de daliqna. 

Gimgim serran ra dima reyna tewrê Têkoşînê Azadîye yê Kurdîstanî bi û seba ke xeyalê Şêx Seîd û Seyîd Rizayî bîyarê ca verê xo da koyanç

Gimgim de 70-80 dewê elewîyan estê. Dewa Emera zî nê dewan ra yew a ke tede 70 keyeyî estê. Dewe binê kişta koyanê Çewlîgî de ya. Wexto ke qerajî ra çew biewno deştêka bêhempa yena dîyene. Deştêka derg û dila û keske. Tîya cayo ke serê sînorê mabênê Kanîreş û Gimgimî de yo, seke cenetê rîyê erdî yo.

Dewa Emera ya Gimgimî nêzdîye qezaya Kanîreşî ya Çewlîgî ya. Dûştê dewe de gola Golbehrî esta. Heme serê koyan de vewre esta. Roniştoxanê dewa Emera ra Bîlal Surmelî 63 serre yo. Wexto ke ma ewnîyêne dewe o zî heywananê xo çarnayeno. Surmelî qala cuya dewe û wareyan keno. Bîlal Surmelî goreyê vatişanê ci 63 serran ra nata dewe ra nêvejîya û cuya dewe ra zaf hes keno.

Keyeyê Bîlal Surmelîyî serra 1947î de dewa Cebanî ya Kanîreşî ra koçê dewa Emera ya Gimgimî kerdo. Surmelî zewijnaye û wayîrê 3 domanan o, eşkeno bi kirdkî û kurmanckî qisey bikero. Bîlal Surmelîyo ke elewî yo vano: ''Ez domanîya xo ra nata heywankarîye kena. Cuya dewa ma zaf weş a. Seba ke zimistan zaf serd û zehmet derbaz beno ma zî pêro karanê xo wisar û hamnana kenê.  Zimistanan rayîrî padîyenê. Seba ke zimistanan karê ma çin o ma têna ewnîyenê heywanan. Xora na herême de heywankarîye û hingdarîye estê. 

Seba ke tîya de zaf kar çin o ciwanî şinê şaristananê pîlan. Ma nêwazenê çew dewe ma ra şoro. Ma pêro hewcedarîyanê xo dewe de bi hawayêkê tabîyî peyda kenê. Pendîr, rûno kele, mast, hingemîn. Ma pêro virazenê. Ez qet dewe nêteriknena. ''

Surmelî vano ke dewe de têna cemxaneyê înan çin o û vano: ''Cemxaneyêkê ma çin o ma tede îbadet bikerê.  Ma zaf wazenê ke yew cemxaneyê ma bibo. Tirkîya de vera elewîyan xeylêk hêrişî benê. La herêma ma de ma pêro kurd ê û vera bawerîyanê xo hûrmet mojnenê. Ma pêro sey yew keye yê.''