Hemserekê HDPyî yê Amedî Zeyat Ceylanî derheqê tecrîdê Îmraliyî de, alozîya Zînî Wertê û yewîya neteweyîye de qisey kerd.

Ceylanî vat: ''Îmrali de vera merdimîye sîstemêk esto ke dinya de mîsalê ci çin o. Pê nê sîstemî yeno armanckerdene ke serê Birêz Ocalanî ra mesaj bêro dayene şarê kurd û hêzanê demokrasîyî yê tirkan. Ocalan pê cuya xo, fikir, hîs û pêşnîyazanê xo têna seba şarê kurdî nê pêro şarê Rojhelatê Mîyanênî bi mîsalêk. Rojhelatê Mîyanênî de seba ke şarê kurdî bibo wayîrê vatişêk şert o ke Kurdîstan de esasêkê demokratîkî ser o seba yewîya neteweyîye game bêra eştene. Rayberê Şarê Kurdî bi serran o ke seba yewîya neteweyî xebitîyeno û veng dano.

Ocalanî mektubê xo de ardêne ziwan ke ganî şarê kurdî yewîya neteweyîye sey esas bigêro û eke gonî birîje çew nêeşkeno binî ra bivejîyo. No mesajê Ocalanî seba Hukmatê Herême, Barzanî, Talabanî û pêro kesanê Başûrî bi. Ganî partîyê kurdî wina têbigêrê ke destkewteyanê xo bipawê, yewîye esas bigêrê. Hêrişê vera parçeyêkî hêrişê vera parçeyan o. Xora Ocalan zî wina vano. Eke kurdan rewî ra yewîya xo awan bikerêne, nê dejî do nêantêne. Kurdî hînî wazenê ke yewîya neteweyî ya şarê kurdî bêra awankerdene.

Ganî Hukmatê Başûrî pê aqlêkê selîmî têbigêro û pê rayîrê dîplomasî meseleya Zînî Wertê çareser bikero. Rixmê vengdayîşanê rayaumûmîye zî heta nika PDKyî gamêke nêeşte. Eke hezêk kurdan îşxalkeran de bazirganîye bikero kurdî pêro do bin bikewê. Ganî mabênê Başûr û Tirkîya de bazirganîye estba la na kurdan ser o nêra kerdene.

Hukmatê AKP-MHPyî prosesê vîrusî sey firsendêk xebitna. Bi hawayêkê faşîstî nêzdîyê kurdan bi, hêrişê destkewteyanê kurdan kerd. Kamê ke hîşmendîya kurdan înkar kenê, ma do nînan teşhîr bikerê. Ma do her hêverî verê sîyasetê şerî bêgerê û hem zî verê sîyasetê înkarkerdişî bigêrê. Rayîrê ma rayîrê têkoşînî û raştîye yo, ma do teqez ser bikewê.''