Têkoşînê 29 serran o ke neslê verên û diyînî ra Fatma Kirbayir, Asiye Karakoç, Berfo Kirbayir dinyaya xo bedilnaye, têkoşînanê tewr emrdergan ra yew o.

Tarîxê Komara Tirkîya tarîxê nezaretan de vînîkerdişî yo. Her safhaya tarîxê Tirkîya de kesê muxalîfî erzîyayî nezaretan. Têkoşînê keyeyanê nê merdiman bi Hasan Ocakî dest pêkerd ke 21ê adara 1995î de amebi destbendkerdene.

12ê adara 1995î de hêrişê vera qewexaneyanê elewîyan ê Taxa Gazîyî amebî kerdene. Hasan Ocak zî serkêşanê rêxistinkerdişê xoverdayîşê Gazîyî ra yew bi. O 21ê adare de ame destbendkerdene. Keye û embazanê ey seba ke Ocak vera bidîyo dest pê çalakîye kerd. La cenazaya Ocakî 58 rojan ra dima Beykoz de ameye dîyene. Nê prosesî de cenazaya Ridvan Karakoço ke amebi destbendkerdene ameye dîyene. Karakoç Musa Anterî reyde Enstîtuyê Kurdkî de xebitîyayêne. Nê serebûtan ra dima reya verêne 27ê gulana 1995î de Meydanê Galatasarayî ya Taksîmî de çalakîya Mayanê Şemeyî dest pêkerd.

No fikrê çalakîye hetê koma bi nameyê 'Destê xo medê embazê ma' ra amebi afernayene ke seba Hasan Ocakî kampanyayêke kerdbî. Her şemeyî çalakîya roniştişî bê pankarta rêxistinêke û bi bêvengî ameye kerdene. Dima rayaumûmîye zî nê çalakîkerî şinasnayî. Her ke şi hûmara çalakîkeran zêdîyaye, dewlete zî hêrişê xo yê vera nînan zêdînayî. Peynîya 1998î de çalakîkerî bi îşkenceyî ameyî destbendkerdene. Heta 13ê adara 1999î mabên dîya çalakîya Mayanê Şemeyî. Mayanê Şemeyî 31ê çeleyê 2009î de bire daye ke heman ca de kom bibê û newe ra dest pê çalakîye bikerê.

Çalakîya Mayanê Şemeyî heta 25ê tebaxa 2018î dewam kerd. Hewteyê 700inî de bi fermanê Wezîrê Karanê Zereyî yê ê çaxî Suleyman Soyluyî çalakîye ameye qedexekerdene. Emîne Ocak zî tede bi seyan çalakîkerî ameyî destbendkerdene. Mayanê Şemeyî nê hewteyî ra dima Komeleya Heqanê Merdiman de çalakîya xo rê dewam kerd. Dima ke Mehkemeya Qanûnê Bingeyîyî qedexeyê çalakîye sey binpaykerdişê heqanê merdiman pênase kerd, Mayanê Şemeyî ancî verê xo da Meydanê Galatasarayî.