Wendekara Zanîngehê Munzurî Gulîstane Doku 5ê çeleyî ra nata Dêrsim de vînbîyaye ya û tira xeberêke nêna girewtene. Xebatê cigêrayîşê Gulîstane Doku yê ke binê awe de ameyêne kerdene bi talîmatê Wezîrîya Karanê Zereyî ameyî vindarnayene.

Hetê bînî ra waya Gulîstane Doku, Aygul Doku hesabê xo yê medyaya sosyale ra da pêhesnayene ke  înan sey keyeyê Doku qerar girewto ke semedê vînayîşê kênaya xo do barê bikerê şirê Dêrsim. Doku vat: ''Ma destûrê nêdanê ke kenaya ma wîna vînîbîyaye bimano. Versûcdarî eşkera meydanan de gêrenê. Wa çew/e ma ra mepawo ke ma kênaya xo ya 21 serre xo vîrî ra bikerê.''

Bedrîye Dokuya ke 6 aşmî yo kênaya xo Gulîstane ra xebere nêgena bi aşman o kişta Royê Munzurî de lawikan erzena aye ser.