Serebûtê 16ê teşrîna verêne ya 2017î û bêhêvîtîya hêzan ê sîyasîyan ê Başûrê Kurdîstanî ra dima Kerkûk de tay ciwanî ameyî pêser û xîret kenê ke hêvî bidê roniştoxanê Kerkûkî û haştîya şaranê Kerkûkî bipawê. Ciwanî şaristan de pê nê armancî huner kenê.

Nameyê koma ciwanan Koma Hîşyarîya Ciwanan a. Ciwanî wazenê Kerkûk bikerê merkezê hunerî. Ciwanan 11ê adare de Kelha Kerkûkî de pêramotişêk akerd. Başûrî ra 120 hunermendan pê 150 resiman tewrê pêramotişî bîyî.

Îdarekaranê Koma Hîşyarîya Ciwanan ra Helgurd Ebdulkerîmî pare kerd ke înan waşt tarîxê Kerkûkî pê hunerî pêşkêşê merdiman bikerê. Ebdulkerîmî îfade kerd ke hûner nîşaneya gandarbîyayîşê ciwanî yo û venga pêro şaranê Kerkûkî da ke terefgîrê hunerê haştîye bibê.