Qezaya Cizîre ya Şirnexî de dima ke qeyûmî amebi tayînkerdene tabelayê kurdkî ameyî wedaritene û kafeyan de kurdkî amebî qedexekerdene.

Roşanê Qurbanî ra verî qeza de Merkezê Bazirganîye (AVM) yê bi nameyê Park Cîzre amebi akerdene. Wayîranê dikanan ê AVMyî xebatkaran rê qedexe kerd ke muşterîyan reyde kurdkî qisey bikerê. 

Goreyê zanayîşanê ke xebatkaran ra ameyî girewtene, wayîranê dikanan xebatkaran rê vat ke dikanan de seba qeydê veng û dimenî hacetî estê û qiseykerdişê kurdkî qedexe yo. 

Ame parekerdene ke muşterîyêkî/e xebatkaran rê persa 'Şima çira kurdkî fam kenê la tirkî cewab danê?' Xebatkaran zî wina cewab da: ''Wayîranê dikanan kurdkî qedexe kerde. Eke ma kurdkî qisey bikerê ma do karê xo ra bibê.''