Dima ke Şaredarîya Colemêrgî ya HDPyî rê qeyûm ame tayînkerdene şaristan wêran bi. Colemêrgo ke serra 2015î de destê DBPyî de bi hetê AKPyî ra ci rê qeyûm amebi tayînkerdene. Şaredarîya Colemêrgî heta weçînayîşê 31ê adare mabênê serranê 2015-2019î de destê qeyûmê AKPyî de mend. Nê serran de şaristanî rê xizmetêk nêame kerdene û taxê ci ameyî wêrankerdene.

Weçînayîşê 31ê Adara 2019î de Şaredarîya Colêmergî hetê HDPyî ra ameye destvistene. Şeş mengan ra dima 18ê teşrîna verêne ya 2019î de Şaredarîye rê reyna qeyûma ame tayînkerdene.  Nê 6 mengan de HDPyî şaristanî rê xizmetê pîlî kerdî, rayîrê ci newe kerdî. La dima ke qeyûm ame şaristan reyna wêran bi.

Seba ke hamnan o rayîrê şaristanî mîyanê tozî de mendî. Wexto ke varan vareno merkezê şaristanî beno sey gole. Wesayîtî zî merdimî zî nêeşkenê rayîrî ra şorê. Rizmo ke hemwelatîyan vera na rewşe nêrazîbîyayîşê xo mojna hema zî gamêke nêerzîyaye. Şaredarîya Colemêrgî zî têna leşker û polîsan rê xizmet kena. Qeyûm îmkananê Şarederîye xebitneno û qereqol û leşkergehan virazeno

Hemwelatîyêkê Colemêrgî pare kerd ke rewşe tewr hol nîya û vat: ''Rayîrî xira bîyî. Qeyûm rewşe vîneno la çîyêk nêkeno. Seba talanî dest na Şaredarîya ma ser. Ma ey nêwazenê. Ganî Şaredarîye teslîmê şarî biba.''