Endama Koordînasyonê KJKyî Besê Erzîncan derheqê turê diyînî yê weçînayîşanê serekkomarîye yê 28ê gulane de ANFyî rê qisey kerd û venga pêro cinîyan û şaran da ke seba binvistişê rejîmê AKP-MHP-HUDA PARî, Erdoganî raye bidê.

Qiseykerdişê Besê Erzîncan ra tay noqtayê girîngî wina yê:

''Îqtîdarê AKP-MHPyî pê dek û dolaban û kayan netîceyê weçînayîşanê 14ê gulane vurnayî û xo ser serkewte mojna. Rixmê ney zî şarê ma bi qerardarî şibi sindoqan ser û raya xo daye Partîya Çep a Keske. Partîya Çep a Keske xeylêk cinîyê wekîlî şawitî Meclîsî. Se ra 49ê wekîlê ci cinî yê. Yanî Partîya Çep a Keske temsîlîya cinîyan asta berze de arde ca. Ma nê destkewteyanê cinîyan fîraz kenê. Partîya Çep a Keske pê sîstemê hemserekîye û temsîlîya têdûşte bawerîya cinîyan qezenç kerde.

Rayberê ma binê tecrîdê giran û mutleqî de yo. La nê prosesê weçînayîşî de partîyanê Îtîfaqê Milet û Cumhurî bi hawayêkê bêexlaqî xîret kerd ke Rayber Apoyî bikerê malzemeyê weçînayîşî. Rayber Apo rayberêko winayên o ke rixmê şertanê Zîndanê Îmraliyî zî paradîgmaya azadîya cinîyan û şaran aver berde û azadîye û haştîye pawite. Coka ma tecrîdî, hesabanê serê Rayberîye qebul nêkenê. Erkê cinîyan o verên o ke wayîrê fikranê Rayberîye vejîyê û seba azadîya ey têkoşîn bikerê. Tecrîdê vera Rayberîye tecrîdê vera cinîyan o. Ganî Îtîfaqê Kede û Azadîye zî her ca û wextî de azadîya Rayberîye û wedaritişê tecrîdî bikero meseleya xo ya verêne.

Îtîfaqê Kede û Azadîye yo ke Partîya Çep a Keske zî tede ya, nêeşka hedefanê xo bîyaro ca. Xora sere de vera Partîya Çep a Keske vera înan teda û hêrişî pîlî est ê. No îtîfaq îtîfaqêkê weçînayîşî ney îtîfaqêkê têkoşînî yo. Coka ganî Îtîfaqê Kede û Azadîye naye ra pey bi rêxistinîyêka xurtêre, têkoşînêkê xurtêrî û xoverdayîşêkê xurtêrî dewam bikero, rolê xo yê stratejîkî bîyaro ca.

Îtîfaqê Kede û Azadîye sey alternatîfê îtîfaqanê cumhur û Miletî vejîya werte la nêeşka goreyê rayîrê hîrêyînî sîyasetêkê zixmî bikero. Ganî Îtîfaqê Kede û Azadîye şarî reyde hîna zaf biameyêne pêser, propaganda bikerêne û xebatê xurtî bikerdêne. Yanî ganî Partîya Çep a Keske û HDP hîna zaf giranîye bidê sîyasetê rayîrê 3.

Îtîfaqê AKP-MHP-HUDA PAR-Refahî armanc keno ke faşîzmî xorin bikero, hêzanê demokrasî û azadîye hîn zaf hedef bikero. Estbîyayîşê HUDA-PARî mîyanê Îtîfaqê Cumhurî de mojneno ke Tirkîya şina kamyew hetî ser. Xora Îtîfaqê Cumhurî xeta Talîban û DAÎŞî de estbîyayîşê cinîyan çin hesibneno û dişmenîya cinîyan keno. AKP-MHP- HUDA PAR-Yeniden Refah tam bîyo îtîfaqê camêrdanê dişmenanê cinîyan. Cinî û şarî xora do cewabê nê îtîfaqê gemarinî bidê.

Îtîfaqê Miletî çareserîya meseleya kurdan û temamîya heqanê merdiman xo rê derd nêkeno. Ganî Îtîfaqê Miletî hîna zaf giranîye bido heqan û azadîyan. Reyna no îtîfaq derheqê nasnameyê azadî yê cinîyan de zî samîmî nîyo.

Turo diyîn ê weçînayîşê serekkomarîye zaf girîng o. Ganî pêro hêzê azadîye û demokrasî seba turê diyînî teberê welatî û welat de raya xo bidê. Ganî cinî û şarî turê diyînî de bingeyê binvistişê Erdoganê faşîstî û Îtîfaqê AKP-MHP-HUDA PAR-Yeniden Refahî de raya xo bidê. Xora netîceya ci se beno wa bibo ma do bingeyê 'Seserra 21. do biba seserra cinîyan' de xebatanê xo rê dewam bikerê. Ma xoverdayîşî rêxistin bikerê.

Nê weçînayîşan de îsbat bi ke ganî pêro cinî, elewî, şarî, hêzê demokrasî û azadîye yew bibê, xo rêxistin bikerê û pîya têkoşîn bikerê. Ma seserra 21. bi şîarê 'Jin, Jiyan, Azadî' bikerê seserra cinîyan.''