Tepişteyê dewaya PKK-PAJKî 27ê teşrîna peyêne ra nata grevê vêşanîye de yê. Seba paştdayîşê tepişteyan zî dadî û merdimê tepişteyan grevê vêşanîye de yê.
Dayîke Sîtîye zî Nobeta Edaletî ya Wanî de cagêna. 

Dayîke Sîtîye wexto ke qezaya Miksî ya Wanî de mendêne seba ke ferzkerdişê qoricîtîye qebul nêkerd keyeyê ci neçare mend ke koçê merkezê Wanî bikero. La Wan de zî JÎTEMî keyeyî rê gefê kiştişî û îşkence kerd. 

Dayîke Sîtîye wina qala cuya xo û nobeta xo kerde: ''Mi merdimê xo vînî kerdî. Ewro zaf merdimê ma hema zî tepişte yê. Seba ke paştî bidda grevê vêşanîye ez tîya de ya. Ez Mîksî ra ya. Ma uca de heywankarîye kerdêne.Dima leşkeran ma rê qoricîtîye ferz kerde. Mêrdeyê mi vat 'Ez bimira zî qoricî nêbena.' Leşkeran cuye ma rê kerde herem, ma zî koçê Wanî kerd. Domanê mi tewrê karanê partîye bîyî.  

Ez bi rojan zî qala zulmê dewlete bikera nêqedîyeno. Serranê 90an de rojêke leşkeran eşt keyeyê ma ser, çeke naye sereyê ma ra. Birayê mêrdeyê mi tepişîya, bi serran zîndan de mend. O çax lajê mi Ozgur Gundem de xebitîyayêne. Leşkeran bi rojan îşkenceyê nê lajê mi kerd. Leşkeran her roje eştêne keyeyê ma ser û domanê mi pers kerdêne. Rayêk lajê mi înan rê vat 'Şima ewro wina kenê la rojêke ma do wina bikerê.' Naye ser o leşkerî hêrs bîyî, tay mend ke înan lajê mi bifatisnê. 

Ewro ma tîya de Nobeta Edaletî de yê. La edaletê dewlete nêmendo. Zerrîya pêro dadîyan vêşena, wa zerrîya dadîyanê bînan nêvêşa. Zîndanan de domanê ma grevê vêşanîye de yê. Ê haştîye wazenê, çareserîye wazenê. Wa waştişê înan bêrê qebulkerdene, tecrîd wedarîyo û haştîye bêra. Coka ma do nobeta xo rê dewam bikerê.''