Çalakîya Nobeta Edaletî ya ke vera zextanê zîndanan û polîtîkaya îşkenceyî Wan de yena kerdene roja 122 de ya. Dayîka Haşîtye Behice Sabaya ke na çalakîye de ca gena semedê wayîrvejîyayîşê tepişteyan veng da.

Dayîke Sabay ard ziwan çar aşmî yo a nêeşkenê lajê dir pêvînayîş bikero û vat: ''Ma nêeşkenê ewladanê xo bivînê. 122 rojî yo ma tîya nobete tepişenê. Qicê ma bîlasebeb, bêsûc kerdî zîndanan. Nê zî qîm nêkerd zîndanan de her hetî ra înan rê îşkence kenê. Mîyanê 3 aşman de 60 tepişteyanê sîyasîyan dînyaya xo bedilnaye. Çend aşmî yo seba ke ma bale binacê naye ser nobete tepişenê. Seba ke huqûq bêro caardene, îşkenceyo sîstematîko ke zîndanan de yeno kerdene biqedîyo, ma tîya de yê. Çar aşmî verî gama ke mi lajê xo de qisey kerd ey vat îşkence esto û ma ewro vînenê ke no îşkence zêdîyayo. Tepişteyê sîyasîyî binê şertanê giranan de yê. Yenê tecrîdkerdene. Ganî partîyê sîyasîyî û dezgehê komelê sîvîlî na babete de dahîna hîsgêr têbigêrê. Wa şarê ma bineyna  hîsgêr bo wayîrê tepişteyan bivejîyo. Êyê ke zîndanan de yê qicê ma yê, sîyasetmedarê ke pê reyanê ma ameyî vîjnayene ê yê. Ganî ma wayîrê înan vejîyê. Wa her kes bi zanayîş têbigêro. Ma do heta qedîyayîşê îşkenceyê sîstematîkî yê zîndanan tîya de bê.''