Deklarasyonê Newroza 2024î Amed de, Komeleya Kultur û Hunerî ya Dîcle de bi kombîyayîşê çapemenîye ame eşkerakerdene. Têgêrayîşê Cinîyan ê Azadan (TJA), DEM Partî, Kongreya Komelê Demokratîkî (KCD) û DBPyî deklarasyon pîya eşkera kerd. 

Hemserekê KCDyî Berdan Ozturkî deklarasyon wend.

Deklarasyonê Newroza emserênî wina yo:

''Newroza ke seba şaranê Mezopotamya mujdeyê wisar û neweyîyan a, seba şarê kurdî adirê xoverdayîşî yo. Şarê kurdî tim vera serdest, kolonyalîst û îşxalkeran têkoşînêko pîl kerd, bedelê pîlî dayî. Rayberê Şarê Kurdî Abdullah Ocalanî şerê şarê kurdî bi qiseyê 'Şerê ma vera bindestan ney vra tedayan û bindestîye yo' pênase kerd.

Ewro Newroze têkoşînê vera ferasetê dewleta nîjadperest, tekperest û cînsîyetpereste temsîl kena. Meşaleya Kawayê Asinkerî Zîndanê Amedî de destê Maslûm Doganî de ancî ameye tavistene û hema zî visîyena ta. Na meşaleya azadîye hetê Zekîye Alkan û Rahşane Demîrel ra ameye geşkerdene û Newroze kerde Newroze, şarê kurdî kerd Newroze.

Coka Newroze seba ma zaf girîng a. Ewro zî zulmê vera şarê kurdî dewam keno û vera ziwan, bawerî, nasname û kulturê kurdan dişmenîye yena kerdene. La vera nê kerdişan xoverdayîşêko heybetîn yeno kerdene û warê Newroze zî warê nê xoverdayîşî yê. Şarê kurdî emser Newroze bivurnê adirê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye.'

Azadîya Birêz Ocalanî azadîya pêro kurdan a. Ewro Birêz Ocalan binê tecrîdêkê mutleqî de tepişîyeno. Coka ma waranê Newroze do bikerê waranê caardişê azadîye Abdullah Ocalanî.

Newroze yewbîyayîş û xoverdayîş o. Erkê ma yo ke ma yewîya kurdan bîyarê ca û verê xayîn û hemkaran bigêrê. Qehremanan û şarê ma rê sozê ma azadîye û yewî ya.

Rayraşîyayîşê Azadîye yo ke serrgêra Komployê Mîyanneteweyîyî de dest pêkerd, teşrîna peyêne de resa Gemlîkî û uca ra mabênê 1-15ê sibate de Kurdîstanî ra gêra bi hêzê meydananê 8ê Adare Newroze do bireso safhayêka bîne. Bi ruhê xoverdayîşî Newroza emserênî bi şîarê 'Wurze we, Wextê Azadîye û Serkewtişî yo' do bêra fîrazkerdene. Emser adiro verêne erdê Mazlûm Doganî de Depe de 15ê adare de do bêro tavistene. Heman roje sûranê Amedî û Kadifekaleya Îzmîrî de zî adir do bêro tavistene. Dima ma adirê Newroze şaristananê sey Wan, Êlih, Şirnex, Îstanbul, Îzmîr, Mersînî de berz bikerê û 21ê Adare de Amed de têkoşînê azadîye tacîdar bikerê. Bi na wesîle ma venga şaranê Rojhelatê Mîyanênî û şarê kurdî danê ke bibê çeqê Newroza 2024î.

Wext wextê azadîya Rayberîye û şiknayîşê tecrîdî yo.

Wext wextê caardişê yewîya kurdan o.

Wext wextê wayîrvejîyayîşê ziwan û kulturî yo.

Wext wextê vervejîyayîşê îşxal, kolonyalîzm û qirkerdişî yo.

Wext wextê têkoşînê hemparî yê vera zulmî yo.

Wext wextê vurnayîşê Newroza xoverdayîşî ver bi Newroza azadîye yo.

Newroz Pîroz Be

Newroz Pîroz Bo"