Vizêr qezaya Îlîçî ya Erzînganî de madenê zerdî de hezaz qewimîyabi. Endam û îdarekaranê DEM Partî waşt ke şorê Erzînganî la ê ameyî astengkerdene. Naye ser o înan bînaya DEM Partî ya Dêrsimî de eşkerayîye daye.

Hemserekê DEM Partî yê Dêrsimî Ozcan Gurtaşî vat ke destûr nedîya ke ê bikewê Erzînganî. Gurtaşî vat: ''No astengkerdiş zî maneno astengkerdişanê seba serebûtanê bînan. Seba ke îqtîdar sermayeya terefgîranê xo pîl bikero cografyaya ma talan keno. Îqtîdar wazeno nê talanî rayaumûmîye ra binimno.''

Gurtaşî bale ante ser ke felaketî ra dima sîyanur vila bîyo û vat: ''Ganî no ocaxê madenî bêro qefilnayene. Wayîrê nê madenî şîrketa kanadayîje Angagold a û şirîkê ci zî Çalik Holding o. Mesuldarê nê felaketî AKPyî zî çimeyê xo qefilnayî.''