Seba Zagrosan vateyê sey bîyayîşê derguşa merdimîye û vilabîyayîşî, goreyê rastîyanê tarîxî yenê vatene. Yeno zanayene êyê ke ewro wayîrîya derguşa merdimîye kenê gerîlayê azadîya Kurdistanî yê.

Bi gerîlayanê ke na coxrafyaya esile de hem hemverê hêzanê îşxalkaran de û hem zî talakeran de canê xo kerdê mertal cewherê xoza ameyo pawitene. Gerîlayî nobetdarîya na coxrafyaye kenê. Serê raywanîya peyêne ya Alî Xebatî ra di serrî vîyartê, ke ê derguşa merdimîye çaryew seserre xo rê kerdibi ware, bê vindertiş.

Alî Xebat (Mehdî Tûnç) ke Nisêbînê Mêrdînî de ameyo dinya, 1992 de Ewropa de ke koçê ci kerdibi PKK nas kerd û dest bi raywanîya Zagrosan kerde. Xebatî Zagros û Zap de bêvindertiş gerîlatî kerde. Gerîla Alî Xebato ke çaryew seserre koyan de mend Çileya 2016î de bi krîzêkê zerrî şehîd kewt.    

Asan nêyo ke merdim qalê gerîlayê şorişgêrî yê nêmerdeyî Alî Xebatî bikero ke şerê hemverê îşxalkaran de xeylî reyan birîndar bîyo la çirey koyan ra gamêk zî peyde nêeşta.

Belkî zî tewr rind albûmê fotografan û rojnûşteyê ci eşkenê behsê gerîla Alî Xebatî bikerê, ke gerîla Xebat şertanê tewr çetinan ê fîzîkkîyan ê xoza de bi nê fotografan bîyêne nêmerde û kerdêne ke vîrardişanê xo pê înan bipawo.    

Bi vateyê, “Tewr rind gerîla eşkeno qalê gerîlayan bikero” çend notê ke Alî Xebatî Gulana 2001î de rojnûşteyê xo de nûştê wina yê:

 ‘VURAYÎŞÊ STRATEJÎKÎ MA HET DE ZÊHN ZÎ AKERD Û WINA BICA AME’

“Gama ke ARGK ame awankerdene, goreyê şertanê wextî ra bi amacê xoserbîyayîşî amebi awankerdene. Serra 1999an ra tepîya gama ke çarçiwaya vurayîşê stratejîkî de newekerdişê HPGyî ame rojdem, nizdbîyayîşê winayênî vejîyayî meydan, seke ARGK awanbîyayîşêko şaş bîyo. Amebi waştene ke kemasîyî barê ARGKyî bêrê kerdene, la bi ma zor ameyêne ke ma çarçiwaya vurayîşê stratejîkî bivînê. Lazimî bi awanbîyayîşêkê sey HPGyî estbîye. Xora tarîxî wayîrê nê hişmendîya xelete vetî meydan. Newekerdişî ma het de zêhn zî akerd û wina bica ame.”

“Ma ameyê serê xeta Pawitişê Meşruyî yo ke Rayber Apoyî dayo verê ma, bicaardişê rolê rayraşîyayîşî û nizdbîyayîşê goreyê nê esas o. Seke hayîya ma nê rolî ra esta, oyo muhîm vurayîşê nameyî nêyo, bicaameyîşê vurayîşê hişmendî yo ke Rayberîya eşkera kerda. Ne nameyê ARGK yan zî yê HPGyî çîyêk nêvurneno. Ganî sere de hayîya ma ci ra bibo ke no qewimîyayîşêko wina yo ke ci rê vurayîş lazim o. Ez xo ra bawer a ke ez do serê xeta Rayber Apoyî de hişmendîya xo bivurnî. Bawerîya mi esta ke ez do vurayîşê hişmendî bica biyarî û dogmatîzmî raşanî, na bawerîya min a bi Rayber Apoyî ra yena.”  

 ‘RAYBERÎYE UMÎD A, UMÎDÊ HEME ERCANÊ AFERNAYEYAN A’

“Rayberîye umîd a, xet a, umîdê heme ercanê ke ameyê afernayene ya û temsîlkarê şehîdan a. Her çend bi tewrbîyayîşêkê hîsî bibo zî ez naye ra bawer kena ke ez do pabesteyê ercan bimanî.”

“Dinyaya ma ya ewroyêne de, xusûsen zî Rojakewtena mîyanêne de, pawitişê afernayeyanê Rayber Apoyî gama ke merdim ewnêno halê Kurdistanî ra û prosesê ewroyênî ra çîyo tena yo ke merdim eşkeno vajo xeta HPG û YJA STARî bi hawayêkê qetîyî temînat a.”

“Koyê Kurdistanî hetêk ra heta hetê bînî wayîrê ercêkê berzî yê. Heman wextî de koyî bi estbîyayîşê gerîlayan hîna bierc benê û ganî ma zî nê berzbîyayîşî rê wayîr vejîyê. Ez do wayîr vejî. Heta helmê min ê peyênî zî tu hêz nêeşkeno mi nê koyan ra bivisno.”

“Şehîdî moral û manewîyatê tewr pîl ê. Manaya şehîdan a ya ke merdim pabesteyê ercan bo.”