Dêrsim de verê cayê mendişî yê Zanîngehê Dêrsimî û Ehl-î Beytî de çawişî vera pê wesayîtanê xo gêrenê û medayaya komelkîye ser o wendekaran de têkilîye nanê ro. Çawişê dewleta tirke seba her wendakarêka ke pa têkilîye nanê ro vanê ''Ma kurdêka bîne kişte.'' Wendekarê ke maruzê tacîz û tecawuzê çawuşan manenê ya şaristan û zanîngeh ca verdenê yan zî xo kişenê.

Nê rojanê peyênan de wendekarêka ke maruzê tecawuzî bîye ameye berdene bi nêweşxqane û seba ke gerreyê çawişan nêkera ci rê burs ame dayene. Cayê mendişî yê zanîngehî de zî tim babeta ''kurtajî'' yena vatene. Wendekarê ke vera mesele nêrazîbîyayîşê xo mojnenê û muracatê huqûqî kenê bi zorî vengê înan yeno birnayene.

Wendekaranê Zanîngehê Munzurî ra Bêrîtane Akdag û Hîvda Tekkaynar derheqê serebûtanê Dêrsimî de qisey kerd.

Bêrîtane Akdag vat: ''Her roje Dêrsim de asayîş beno meseleyêke. Dormeyê cayê mendişî yê zanîngehî de tim wesayîtî gêrenê. Nê embazanê ma yê cinîyan xapînenê. Ma zanenê ke nê merdimî seba çi armancî xo nêzdîyê ma kenê. Nê merdimî wazenê kultur, bawerî û nasnameyê ma çin bikerê. Babeta kurtajî tim yena qiseykerdene. Embazêka ma wexto ke yew çawişî de qisey kerdêne çawişî ci rê vat ma kurdêka bîne kişte. Çawişî tim aktîvîteyan de vejîyenê verê ma, xîret kenê ke medyaya komelkî ser o biresê ma. Nê rojan de yew serebûtê tecawuzî qewimîya la seba ke serebût ame mîyankerdene derheqê ci de zanayîşêk çin o. Embazê ma cinîyî nê serebûtan ra dima ya zanîngehî ra fek vera danê yan zî şaristan teriknenê. Aseno ke nê çawişî tîya de polîtîkayêka taybete ya şerî anê ca. ''

Akdage da zanayene ke têkilîya serebûtê Gulîstane Doku bi nê serebûtan esta û vat: ''Eke Gulîstane raşt a zî vinbîyaye bîyêne ameyêne dîyene. Serebût yeno mîyankerdene. Ganî ma sey cinîyan nê polîtîkayan bivînê. Ma 8ê Adare de bivejîyê meydanan û vengê xo pît bikerê.''

Hîvda Tekkaynar zî vat ke Dêrsim de vera wendekaran têgêrayîşêk esto û vat: ''Taxa Ataturkî de zaf çawişê dewlete estê. Têna armanc kenê ke cinîyan reyde têkilîye bikerê û şaristan pûç bikerê. Di mengî verê cû çawuşêkî tecawuzê yew cinîye kerd. Wexto ke cinîye xo kişena embazê ci pê hesîyenê û mudaxeleyê ci kenê. Dewlete wazenê zaf serebûtan mîyan bikera. Serebûtê Gulîstane Doku zî înan ra yew o. Ganî ma seba Gulîstane vengê xo vejê. No yew serebûtê xokiştişî nîyo. Eke wina bibo zî binê ci de yew semed esto.''